Голосник

В Ужгороді хотять уліцю Фединишинця. Екстремісты протестують

Вже завтра 19-го юна 2019-го року будуть проходити в Ужгородьскій містьскій раді публічны діскусії о переменованю дакотрых уліць і о назвах новых уліць. Меджі пропонованыма змінами є і пропозіція переменовати Уліцю Антона Кашшая на Уліцю Володиміра Фединишинця.

Ужгород бы такым чіном дістав уліцю з меном єдного із найвызначнішых русиньскых актівістів і писателів по 1989-ім році. Націоналісты і екстремісты зо Свободы і Карпатьской січі протестують.

Володимір Фединишинець

Русиньскый писатель і діятель Володимір Фединичинець народив ся в селі Репинне 9-го мая 1943-го року. Быв то педаґоґ, писатель, журналіста, публіціста, теоретік літературы.

Фединишинця мож брати як чоловіка, котрый на кінцю совітьского періоду зачав русиньскый рух на Підкарпатю. Належав меджі основателів орґанізації Общество подкарпатських русинов, котре стало пізніше основательсков орґанізаційов Світового конґресу Русинів. Хотів, жебы русиньскый язык быв кодіфікованый, о чім написав і дакілько есеїв, дакотры з них были публікованы у триязычній русиньско-словацько-анґліцькій публікації Мирна наша русинська путь із 1992-го року, але і в далшых публікаціях. Быв автором многых книг і есеїв. По 1989-ім році зачав писати по русиньскы. Як чітаме в завершалнім слові ку збірці Мы – слызынка на земли выданій у 1999-ім році, по русиньскы думав одколи ся народив, но писати по русиньскы зачав десять років тому.

Володимір Фединишинець є і автором крылатого выслову Мы Русины – Неба сыны і далшых. У 2004-ім році став лавреатом Премії Александра духновіча за русиньску літературу в рамках котрой передавать ся мала скулптура карпатьского медвідя. Вмер 3-го октобра 2018-го року.

Екстремісты протестують

Проти задуму переменовати в Ужгороді Уліцю Антона Кашшая, котра бы по новому мала мати мено Володиміра Фединишинця, ся вже озвали націоналісты і екстремісты. Як перша зачала протестовати націоналістічна політічна партія Свобода, конкретно їй закарпатьска областна орґанізація.

„Высловлюєме свій катеґорічный протест проти того, жебы в Ужгороді появила ся уліця єдного із іншпіраторів сепаратістічного руху на Закарпатю, котрый быв меджі основателями антіукраїньского Общества подкарпатських русинів Володиміра Фединишинця, якый робив редактора українофобной ґазеты Подкарпатська Русь,“ пише ся у выголошіню Свободы.

Націоналісты далше обвинюють Фединишинця зо сепаратізму, говорять же є аморалным уж лем тото, же о такім чімсь як названя уліці його меном іде ся діскутовати.

Тихо не зістала ани Карпатьска січ. „Як сьме ся дізнали, в Ужгороді планують назвати єдну уліцю на чесь русиньского сепаратісты Володиміра Фединишинця,“ пише екстремістічна Карпатьска січ під веджіньом Тараса Деяка. Знова повторяють то, же Фединичинець основав русиньску орґанізацію і прикладають, же Фединишинець „зъєдиненя Закарпатя з Українов“ называв окупаційов.

Карпатьска січ кличе людей на завтра до Ужгородькой містьской рады. Хотять „сохранити Ужгород од далшой сепаратістічной ганьбы.“

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі