В Варшаві зачал ся Тыжден Языковой Ріжнорідности

0

В понедільок, 13. листопада/новембра 2017 рока, в будинку Університетской Бібліотекы в Варшаві зачал ся Тыжден Языковой Ріжнорідности, реалізуваний через выділ Artes Liberales Варшавского Університету і його партнерів в рамках проєкту Заанґажувана Гуманістика. Його початок был по лемківскы – єдній з подій проєкту товаришыл речіталь Петра Мурянкы.

Тыжден Языковой Ріжнорідности і першу загальнодоступну подію в його рамках – одкрытя фотоґрафічной выставы Языкова Ріжнорідніст – культурове богатство світа – зачали орґанізаторы: др. габ. Юстина Олько з выділу Artes Liberales і проф. Анна Ґіза-Полещук, проректор Варшавского Університету. Пак, на бібліотетскій подворец вошол Петро Мурянка, найвыдатнійший сучасний лемківскій літерат, котрий был прошений не лем прочытати своі вершы, але і – як творця, котрий до своіх і другых авторів вершів компонує музыку – заспівати.

То не конец русиньскых акцентів Тыжня Языковой Ріжнорідности. В найблизший четвер, 16. листопада/новембра, одкрыта буде выстава пн. Ріжнородніст языкова в світі. Товды же, о 17.00 год. в Казімєжовскым Палаци, своі вершы прочытат Олена Дуць-Файфер. Выстава буде доступна до 30. листопада/новембра 2017 р. Окрем того,  др габ. Олена Дуць-Файфер выступит на науковій конференциі, яка буде проходила 15.-16. листопада/новембра. Єй доповід заплянувана єст на четвер, 16. листопада/новембра, вчас головного панелю о 10.30 год. Тема, котра вызвучыт по русиньскы, то: Стратити язык – што то значыт, што то творит. Лемківскє выгнаня з языка.

Share.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.