Голосник

В Верховни над Попрадом гонорувано памят Владимира Хыляка

В суботу 12 жолтня в Верховни, недалеко Пивничной, торжественно чествувано памят про великого русиньского писменника автора “Шыбеничого Верху” Владимира Хыляка. Покладено квітя на горбі його вітця – о. Ігнатия Хыляка, котрий был долгы рокы парохом в селі Верховня.

Пак творці в готели “Вєрхомля” презентували своі писменничы творы. Пришли гости з Польщы, медже інчыма Барбара Палюхова, котра презентувала заєдно, і своі поетицкы творы, і свій фотографічний альбум посвячений прекрасным місцям Верховні, Верхімкы, Ломниці і Пивничной.

Презентували ся нашы лемківскы творці, в тым дві абсольвенткы лемківской філолоґіі – Анна Масьляна і Марта Ватраль і заслужений для розвитку лемківского языка – Ярослав Горощак.

З Украіны приіхала медже інчыма (знана з радия лем.фм) акторка і співачка – Галина Баранкєвич. Єй рід з Верховни. Очарувала она вшыткых своім голосом і свойом красом. Співали Гудакы.

А вшыткых витал, гостил а і чытал своі твори – ведучий спілорганізатора подіі – Товариства Літерацкого ім. Ципряна Каміля Норвіда а попри тому і шолтыс Верховни Вітольд Каліньскі.

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі