Голосник

Варголь і «фаст фуды»

Тото, же іджыня на скоро, а при тым тзв. «фаст фуды» (з анґ. «стравы на скоро») не сут здоровы, чуєме што кус в телевізиі ци в порадниках. Такой каждый в днешнім світі час-до-часу любит одвидіти того рода бары, головно товды, коли ся му спішыт. Кєд єст так, як пишеме, то тепер вчас консумуваня бурґерів в єдній зo знаных марок з бранжы «фаст фуд» годны сте дакус почути і русиньскій смак.

Знаный світовый бренд Бурґер Кінґ выпустил як раз свою нову рекляму, хоснуючы при тым старый фільм сперед тридцет семох років. Людe од доброго піяру американьской фірмы з бражны бурґерів задумали, што вартат выйти до консументів з пропозицийом сперед років. Тым більше треба было выйти з дачым, што притягне оглядачів і новых клієнтів, зато што рекляма вышла з нагоды фіналу «Супер Бовль», будучого окрем спортового свята американьского футболю і великым святом консумпциі. Так явиля ся нова рекляма Бурґер Кінґа, в якій видно ікону поп-арту і шовмена Енді Ворголя.

В фільмі видно Варголя, якій розпечатує клясичну канапку од Бурґер Кінґа. Вынявшы з паперя, Енді дає си і кечап, а внет зачынат істи бурґера. Цілю притягнути новых клієнтів і вказати, што ачий такы славны того світа як Варголь іли в тій реставрациі, бренд заохочат позначати фотоґрафіі, посты ци локалізациі на нашых смартфонах, при хоснуваню гаштаґу #eatlikeandy.

Робота над новом реклямом реставрациі Бурґер Кінґ тырвала такой рік. Фірма мусіла найперше забезпечыти авторскы права і ліценциі до фраґменту ахрівального фільму з Варгольом, котрый в Америці вказал ся в 1982 році. Полный фільм чыслит понад 4 минуты. Бурґер Кінґ реклямує ся дакус коротшым спотом, якій рахує сорок пят секунд. Долов залучаме ціліст.

Посліднім часом, о чым інформували сме в нашых радийовых новинах, інча знана марка Кока Коля схоснувала выречены Варгольом перед роками слова о взаімній толеранциі і пошані серед люди, вказуючы, што славный напиток є для вшыткых во світі, незалежно од походжыня, нацийональности ци переконань.

фот. прінтскрін з реклямы

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі