Голосник

Вікенд богатий в русиньскы подіі. А Ты – де ся збераш?

Найблизший вікенд принесе вельо подій з русиньской обшыри, о котрых не лем хотіли бы сме поінформувати, але і сердечно запросити. Літній період то найліпший час, на того рода акциі, а в найблизшы дни хвиля не повинна фиґлювати…

Пятниця, 27. липця/юлия 2018 р.

Зачнеме од Лемковины і села, де такой 100 років тому одбыло ся віче, котре было причынком до славного фльориньского віче, якє завязало Руску Народну Республику Лемків – то Ґладышів, де днес одбуде ся прогулька, орґанізувана Ґмінным Осередком Культуры в Ропі. То запрошыня для діти, котры хотят звидіти Лемківску Загороду в Ґладышові, ведену Данутом і Йоаном Дюбинами. Мотузок до подіі: гев.

Вечером, посеред білоруской меншыны в підляшскій Біловежы выступит Сусанна з ансамбльом на фестівали Переточе. Орґанізаторы радо просят там ансамблі з русиньскым репертуаром, зато і того рока буде го мож почути і то в такым(!) выконаню. Певно не бракне і Мурянковых пісен, котрых Сусанна єст бодай найбільшым промотором.

Субота, 28. липця/юлия 2018 р.

А може підете в суботу до місця походжыня славного Енді Варголя – до Миковой. Там до неділі буде тырвал 23. Миківксій Фестіваль Русиньской Культуры. Мотузок: гев.


Іщы в суботу і тіж на Пряшівскій Руси, доста недалеко Миковой – в селі Владыча – вчас кєрмешу выступит русиньскій бард, лавреат І Фестівалю Лемківской Авторской Творчости «Молода Лемковина», орґанізуваного Руском Бурсом і радийом Лем.фм. Бесідуєеме о Владиславі Сивым з Пряшова, котрий выступит з пілторагодинным речітальом. Інфо о подіі – гев.

Неділя, 29. липця/юлия 2018 р.

На Пряшівскій Руси мож ся лишыти до неділі, де в Бардиівскых Купелях Русиньска Оброда і Шаришскій Музей в Бардийові орґанізуют Перегляд Русиньского і Шаришского Фольклору. Выступит вельо народных ансамблів, в тым і знана і люблена Мариянна Железна.

Дальше останеме за хырбетом Карпат, але тым разом в підлюбовяньскым селі Баєрівці, де тіж в найблизшу неділю, 29. липця/юлия, зачне ся о 13.30 год. фестіваль. То уж 23. едиция той культурной подіі, Наголовок акциі то першы слова русиньского гымну «Я Русин был, єм і буду».


І на конец – вернеме на пілнічний схыл Карпат, де в селі Санкова, в рамках 12. едициі Фестівалю Музыка Заклята в Дереві выступит з русиньскым репертуаром ансамбль Відимо зо Санока. Концерт одбуде ся в костелі свв. Апостолів Филипа і Якова.

А Вы – де ся выберате?

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментарі