Голосник

Вілкул: Русины існують. Треба їх вызнати як Мадярів ці Румунів

0
5-го юла 2019-го року в Закарпатьскій области Україны проходила конференція під назвов Єдина країна: културна і гуманітарна децентралізація. На конференції брали участь політіци, представителі народностных меншын, гражданьскых орґанізацій і науковці краю.

На конференції, як інформовав портал Karpatnews, обговорили ся общы проблемы, котры днесь траплять представителів многых народностных меншын. Присутный быв і Олександр Вілкун із партії Опозічный блок (укр. Опозиційний блок), котрый про редактора порталу Новини Закарпаття опдовів на вопросы односно вызнаня Русинів на Україні.

Русинів треба вызнати

Редактор у відеу, котре є доступне в сервісі Youtube, звідать ся Вілкула, ці люди, котрых є в Закарпатьскій области много і называють себе Русинами, мають право так называти ся. Олександр Вілкул, котрый быв у роках 2012 аж 2014 віцепремєром Україны, втогды іщі за Партію реґіонів (укр. Партія регіонів) бывшого презідента Віктора Януковіча, одповів на вопрос редактора єднозначно.

„Русиньска комуніта існує, і Русины існують. То факт. І зато до Русинів треба односити ся із решпектом. Русины мають мати вшыткы права народностных меншын, котры суть ґарантованы конштітуційов,“ повів Вілкул. На конштатованя редактора, же Русины на Україні не суть офіціално вызнаны, бывшый віцепремєр повів, же вызнаны будуть, кедьже існують.

„Русины існують, што є обєктівный факт. Самособов, же їх треба вызнавати і давати їм можливости про народностный, културный і языковый розвиток,“ продовжовав Вілкул, котрый доповнив, же мають быти вызнаны так, як Мадярі, Румуны ці Росіяны.

„Покля на то потрібне прияти якыйсь законодавчій акт Верьхонов радов, треба го прияти,“ закінчів політік, котрый быв веце раз депутатом Верьховной рады Україны. Остатній раз сидів в україньскім парламенті до його розпущіня нововыбратым презідентом Володиміром Зеленьскым.

Опозічный блок не є першый з темов Русинів

Опозічный блок не є новов партійов на україньскім політічнім рынку. По страті свого впливу у 2014-ім році, і вдяка зосаджіню презідента Віктора Януковіча по діях на Майдані, зробила Партія реґіонів ребрандінґ і змінила назву на Опозічный блок. Зареґістровала ся втогды як нова партія.

Коли Партія реґіонів была при властях, не рішыла русиньскый вопрос, хоць і в тім часі были загнаны писма од представителів Русинів Україны і світа, жебы вызнати Русинів. Зміна позіції, котру репрезентує днесь Олександр Вілкул, може быти лем реторіков перед парламентныма выборами, котры одбудуть ся на Україні вже 21-го юла.

З темов вызнаня Русинів Опозічный блок не приходить першый. Тот вопрос вже зазвучав перед тогорічныма презідентьскым выборами. Кедь 30-го януара 2019-го року у Києві проходив зъїзд політічной партії Опозічна платформа – За жывот (укр. Опозиційна платформа – За життя), меджі выступаючіма быв і Іван Чубирко, депутат Закарпатькой областной рады, котрый перед делеґатами повів, же є потрібне вызнати Русинів. Сам означів ся за Русина.

„Треба пропоновати… внести народность Русин, за котрого поважам ся і я,“ повів Чубирко, за што дістав од делеґів київского зъїзду аплавз. Далше продовжовав, же тото Русины жадають вже десятьлітя, і же в Закарпатьскій области є народность Русин вызнана од 2007-го року. Так само припомянув, же в іншых державах як Словакія, Польща, США і Канада, вызнавають Русинів, лем не Україна. Чубирко говорив у прояві нелем о народсности Русин, але і о русиньскім языку, котрый за його словами має Україна вызнавати  на основі Европской харты о охороні реґіоналных або меншыновых языків.

Жрідло фотоґрафії: www.vilkul.ua

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар