Голосник

Вілямовяне борют ся за свій язык

0

Братня нам соспільніст вілямівской меншыны рыхтує в днях 23.-24. лютого/фебруара 2018 р. подію присвячену вілямівскому языкови. На дводньовій стрічы выступлят м.ін. дослідникы знаны в лемківскым світі за причыном того, што професийні занимают ся і лемківскым языком та дальшыма лемкознавчыма темами. 

Подія пн. «IV Ден Рідного Языка в Вілямовицях» зачне ся в пятницю (23.02) о 15.00 год. привитаньом гости і проповідьом Гелены Бібы – представничкы вілямівской спільноты. Дальше пройде конференцийна част, в рамках котрой дослідникы і вчены выголосят своі рефераты присвячены проблемам не лем вілямівского языка, але і другых меншыновых языків, якы загыбают. 

В перший ден панельовых выступлінь буде мож почути м.ін. про сучасну ситуацию кашебского языка ци про шлезскій язык. В тот ден голос буде мала і представничка лемківской етнічной меншыны, др габ. Олена Дуць-Файфер. Выголосит она доповід пн. «Втратити язык. Што то значыт, ґу чому то веде?». Реферат пн. «Трудна дорога шлезского языка… Шансы, ограничыня, вызваня» передставит др габ. Ева Міхна, яка занимат ся справами заєдно Русинів, а од деякого часу тіж проблемами Шлезаків. Проф. Збіґнєв Кадлубек – выкладач Шлезского Університету, активіста шлезской меншыны, буде мал доповід пн. «Недоповіджыня. Ситуация шлезского лекту».

Другого дня подіі участникы «IV Дня Рідного Языка в Вілямовицях» выслухают доповіди нт. кашебского языка в публичным просторі та реферату «Гуцульщына вершом і прозом». В суботу выступит і дослідник молодого поколіня, Фома Круль. Він даст доповід про істориі повоєнных переслідувань вілямівской меншыны. 

В рамках дводньовой стрічы запрезентуют ся і фольклорны ансамблі, вілямівскій театр та вказаний буде документальний фільм про Вілямовиці Bo dos ej maj śproh. 

Детальний проґрам чытайте на залученым долов афішы.

 

фот. www.polskieradio.pl

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар