Голосник

Вісем років ЛЕМ.фм

1 червця/юнія то не лем Ден Дітины, котрый того рока специяльно орґанізуваный для наймолодшых через Руску Бурсу в Ґорлицях. То тіж інча, важна річниця в сучасній істориі лемківской громады і нашых слухачів. В найблизшу суботу святкуєме осму річницю діяльности першого лемківского радия ЛЕМ.фм.

Вшытко зачало ся 1. червця/юнія 2011 р. Святочным одкрытьом в Рускій Бурсі выстартувало наше радийо. Днес сміло мож речы, же то така дітина Руской Бурсы, а персональні – думкодавці, якій за радийом ходил – Богдана Ґамбаля. Спочатку може не все было легко, грали сме головні музику з автомату, а проґрамів было невельо. Але уж барз скоро зачали сме постійны авдициі, пак пришло штоденне жыве высыланя.

То і так нич, смотрячы з перспективы часу. Конец-кінцьом Лемкы діждали ся правдивого радия. Днес можете нас чути в реальным ефірі на рідній Лемковині, зо столпу в Ґорлицях, на частотах 106,6 МГз, як і на чужыні, де высыламе зо столпу в Польковицях, на частотах 103,8 МГз, а наш голос несе ся дале поза любіньскій повіт. Высыламе тіж на модерній плятформі ДАБ+ во Вроцлаві і околицях. Але бренд ЛЕМ.фм то не лем радийо. То свого часу і тыжденник ЛЕМ.фм+, а од років доднес штоденный інформацийный порталь www.lem.fm.

Том святочном, а заєдно радістном новином хочеме подякувати предовшыткым Вам – нашы дорогы слухачы. Ідея нашого-вашого радия є проста – грати, інформувати, коментувати, передавати – в рідным лемківскым языку. Знаме, што чысло 8 не є округле. Надієме ся, што так як на 5. річницю діяльности, коли сме рыхтували пікнік при Рускій Бурсі, стрітиме ся на нашу округлу десятку уж о два рокы…

Редакция радия і інформацийного порталю ЛЕМ.фм+ іщы раз дякує!

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі