Голосник

Влада засідала в Стропкові. Грошы дала і до Токаїку ці Буковець

Влада Словацькой републікы у віторок 25-го юна 2019-го року абсолвовала далше із своїх выїздовых засідань, тотраз в Стропкові. Кабінет премєра Петра Пеллеґрініго прияв акчный план того окресу, котрый є так само меджі найменше розвитыма окресами на Словакії. Інформовали аґентуры SITA і TASR.

В найблизшых пятьох роках хоче влада в окресі вытворити 261 робочіх місць. Моментално є безробітность в тім реґіоні над десятьома процентами, причім середнє чісло безробітности в рамках цілой Словакії є моментално на чіслі 4,88 процент. Покля бы ся подарило владі вытворити авізовану кількость робочіх місць, безробітность в окресі Стропків бы была коло 7-ох процент. З цілковой одгадованой інвестіції до року 2023, котра представлює майже 74 міліонів евр, бы мало іти нецілых 69 міліонів в рамках співфінанцованя з европскых штруктуралных і інвестічных фондів. Сума реґіоналной інвестіції має быти лем 1,945 міліона евр.

Влада роздала майже 1,2 міліона

Влада на своїм засіданю знова роздавала. До окресу Стропків піде на підпору реґіону 1,178 міліона евр. Підпореных было понад 70 проєктів сел, но і школ, обчаньскых здружінь, шпортовых команд і церьквей. Найвеце грошей зістане в окреснім місті, де ся інвестує до технолоґій на ледовім штадіоні, выбудованя драгы до промыслового парку ці до закупліня екстерных дефібрілаторів.

Поліпшыли собі і дакотры села. Буківці дітаснуть 30 тісяч евр на закупліня конвектоматів і умывачкы ґратів про основну і матерьску школу. Брезніця дістала із сел рекорну суму 32 тісяч на закупліня заряджіня до сільской і школьской кухні.

Фінанчны средства підуть і до Токаїку. Грошы были приділены на реконштрукцію просторів Музею Токаїцькой траґедії. Вышня Олшава дістала од словацькой влады фінанчну дотацію на будованя православной церькви. Міньовці будуть за днесь приділены грошы оправльовати стріху на сільскім уряді.

Обіцяють обхват

Премєр Петер Пеллеґріні на пресконференції по засіданю влады інформовав, же влада приобіцяла і далшых 41 міліонів евр на збудованя обхвату Стропкова. Тот бы ся мав робити з грошей, котры перенесуть з невычерьпаных еврофондовых средств на проґрамы Міністерства транспорту і будованя Словацькой републікы.

Жрідло фотоґрафії: Peter Pellegrini.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі