Голосник

Вмер проф. Штефан Пастушка. Хтіл, жебы Лемкы мали своє радийо

Як інформує Польска Народна Партия, по тяжкій хвороті, в шпыталю в Кєльцях вмер проф. Штефан Пастушка.

Штефан Пастушка вродил ся в 1940 р. в Олехові Новым при Островци. В 2011 р. был удостойненый званьом професора гуманістичных наук. Долгы рокы был академіцкым учытельом на Університеті Яна Кохановского в Кєльцях.

Был сенатором, депутуваным ІІІ каденциі Сенату Полськой Республикы. Од 1995 до 1997 был віцеміністром нацийональной едукациі. В 2010 р. як кандидат сенату остал членом Крайовой Рады Радийофоніі і Телевізиі – уряду, якій єст реґулятором електорнічных медий в Польщы.

Од 2012 р., коли Стоваришыня Руска Бурса дало до КРРіТ внесок о концесию на высыланя сиґналу радия ЛЕМ.фм з высылачів в Польковицях і Ґорлицях, проф. Пастушка был прихыльником выданя реченой концесиі.

Проф. Пастушка знал проблемы медий нацийональных меншын і добрі ся заслужыл Лемкам при покликаню іх незалежного радия.

фот. проф. Штефан Пастушка; джерело: Krajowa Rada Radiofonii i Telewizji

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі