Голосник

«Воскресеніє народа» неодолга в Інтернеті

Новый документальный фільм од Джона Ріґетті і Мариі Сільвестрі, продукцию котрого підпорила Фундация Джона і Олены Тімо (John and Helen Timo Foundation), 4. вересня/септембра 2019 р. буде мал свою інтернетову премєру на офіцияльным каналі продуцентів в сервісі YouTube. Бесіда про Воскресеніє народа, котрый єст оповістю про тридцетлітя русиньского возроджыня.

Од початку продуцентам залежало, жебы іх фільмы вказуваны были дармо. Офіцияльна премєра образу Воскресеніє народа при участи запрошеных гости, заслуженых русиньскых діячів, продуцентів і дальшых одбыла ся уж 29. червця/юнія 2019 р. в просторах Театру Александра Духновича в Пряшові.

Премєра і бесіда нажыво з продуцентами

Інтернетова премєра фільму Воскресеніє народа зачне ся о год. 19.30 за американьскым часом (год. 1.30 за лемківскым). Як пише Мария Сільвестрі в запрошыню, новым про орґанізаторів буде можніст обзерати образ і єдночасно вести дискусию з продуцентами ци самыма обзераючыма. Вшытко годно ся одбыти в сервісі YouTube, де в окремій рубриці буде нагода нажыво коментувати.

На Фейсбуку покликано подію, котру вартат слідити, понеже будут на єй страні публикуваны інтересуючы інформациі тыкаючы фільму і премєры. Так само, входячы уж тепер в мотузок, під котрым 4. вересня/септрембра буде премєра, мож записати ся на обзераня, а додатково сервіс YouTube вышле нам скорше припомніня про сеанс.

 Оповіданя про третє возроджыня

Воскресеніє народа оповідат про тзв. третє возроджыня русиньского народа, котре зачало ся під конец 80. років ХХ ст. в звязку з падіньом комунізму в середньо-східній Европі. На основі демократичных перемін русиньскій рух зміг леґально ся возроджати і продолжати свій розвиток.

Образы были зниманы на Словациі, в Канаді і ЗША. В фільмі выступуют присутны при возроджыню діячы, котры тридцет років тому взяли на своі рукы тягар будовы русиньского світа наново. Самособом возроджыня не єст запертом картом істориі, то лем єй част, оно не скінчыло, тырват, русиньскій рух ся розвиват. Детальну рецензию чытайте за тым мотузком.

По інтернетовій премєрі дальшы сеансы

Як інформуют продуценты, окрем премєры онлайн заплянуваных є уж пару сеансів в ріжных місцевостях ЗША. Каждый з них одбуде ся при участи Джона Ріґетті і Мариі Сільвестрі. Деталі будут неодолга публикуваны. На тот момент знатя, што обіздны показы пройдут в шестьох містах Америкы, в штатах Огайо, Пенсильванія, Небраска, Мінесота і в Тексасі.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі