Голосник

Выникла нова єпархія в Руськім Керестурі

0
У четверь 6-го децембра 2018-го року Папа римскый Франціск підняв Апостольскый екзархат про ґрекокатоликів у Сербії і Чорній Горі на Єпархію св. Николая із центром в Руськім Керестурі.

Першым єпархом став дотеперішній екзарха владыка Дюра Джуджар.

Екзархат выникнув по роспаді Югославії

Апстольскый екзархат про вірників візантійского обряду, котрый днешнім дньом, на праздник св. Николая за новым календарьом, став єпархійов, выникнув у 2003-ім році, по роспаді Югославії, коли быв вынятый із Крижевацькой ґрекокатолицькой єпархії. Крижевацька єпархія до 2001-го року мала під собов вшыткых ґрекокатоликів на теріторіях бывшой Югославії.

Од 2013-го року змінила ся назва екзархату на Апостольскый екзархат у Сербії. Катедралным собором од 2003-го року є Церьков св. Николая в Руськім Керестурі, котрый є і головным центром войводиньскых Русинів. Нова єпархія має 21 парохій і коло 22 тісяч віруючіх. Вірниками новой єпархії суть головно Русины, но мож меджі нима найти і Хорватів ці Румунів.

Адміністрація новой єпархії буде в Новім Саді, де дотеперь была і адміністрація екзархату.

Владыка Дюра Джуджар

Першый єпарха Єпархії св. Николая владыка Дюра Джуджар народив ся у 1954-ім році в Дюрдьові, на теріторії днешньой Сербії. Середню освіту в малій семінарії здобыв у Римі, потім там далше продовжовав у філозофічно-богословскых штудіях . У 1985-ім році здобыв у Римі докторат із востночного канонічного права.

Рукоположеный на священика быв у 1980-ім році як священик Крижевацькой єпархії. 15 років робив на Конґреґації про восточны церькви в Римі. У 2001-ім році быв призначеный епіскопом – помічником Мукачівской ґрекокатолицькой єпархії і рукоположыв го на єпіскопа Папа римскый Йоан Павел ІІ. По заснованю екзархату в Сербії у 2003-ім році став його першым екзархом. У 2016-ім році быв владыка Дюра Джуджар выбраный за віцепрезідента Меджінародной епіскопской конференції святых Кіріла і Методія, в котрій суть католицькы єпіскопы Сербії, Чорной Горы, Македонії і Косова.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар