Голосник

Выстартувала продаж білетів на тогорічну едицию Русиньского Фестівалю

0
Як інформуют орґанізаторы найбільшого фестівалю русиньской культуры во світі – Русиньского Фестівалю во Свиднику, од початку марця мож придбати в промоцийній ціні білеты на тогорічну едицию акциі. Вартат ся поспішыти – ціны будут іти в гору. VII Русиньскій Фестіваль пройде того рока в днях 20.-26. мая.

На офіцияльным сайті фестівалю чытаме, што ціна буде ся зміняла залежно од кількости проданых білетів. Єст то інча як в попередніх роках метода принята орґанізаторами – скорше туньшы білеты мож было купити в вызначеным часі.

Згідно з принципами ціна першого тисяча проданых орґанізаторами білетів то 5 евро. На днес є она уж неактуальна, понеже, як інформували 6. марця 2019 р. на фейсбуковым фанпейджы орґанізаторы, ціна одтепер то уж 6 евро і так само обовязує до часу выпроданя дальшого тисяча вступных. Ціна буде ішла в гору, слідуючо 7, 8, 9 аж по 10 евро, в припаді дальшого чысла выпроданых. Вчас фестівалю ціна єднодньового вступного вынесе 10 евро, прото уж тепер рекомендуєме о тым думати. Купуючы наперед, незалежно од ціны, вступне буде обовязувало на три дни.

Хоц до тогорічной едициі подіі більше як два місяці, уж тепер на сайті фестівалю запознавати ся мож з загальным проґрамом. Свидницкій фестіваль, якій тырват тыжден, ріжнит ся од другых того рода ініциятив. В тым році не бракне части присвяченій выступліням наймолодшых і молодежы. В другій ден фестівалю во Свиднику выступит професийональный Театр Александра Духновича з Пряшова. Дальше має пройти сесия присвячена Інститутови Русиньского Языка і Культуры Пряшівского Університету. Музична част то вікенд 24.-26. мая. Видіти буде мож знаны – предовшыткым – русиньскы ґрупы і ансамблі. Жанры будут ріжны – од фольклористичных по модерны. Ближе фестівалю принесеме детальны інформациі о проґрамі і тогорічных атракциях.

Про вступне чытайте на сайті www.rusinskyfestival.sk.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар