Выставка фотоґрафій традічной архітектуры на школі в селі Уліч

Вігорлатьскый музей в Гуменнім у співпраці із фотоклубом REFLEX Гуменне і селом Уліч запрошують вшыткых заінтересованых на выставку фотоґрафій, котры документують всокочены вынятковы елементы традічной архітектуры на теріторії окресу Снина.

Выставка під назвов Што нам зістало… є од 14-го фебруара 2019-го року іншталована в просторах Основной школы з матерьсов шкослов Александра Духновіча в селі Уліч. Містна школа є найвыходнішов основнов школов на теріторії Словацькой републікы і як раз з уліча походить дакілько елементів културной дідовизны, котры мож видіти на фотоґрафіях. Інформовала о тім Яна Федічова із гуменьского музею.

Продовжіня векшого музейного проєкту навертать ку коріням

Презентованы творы гуменьскых фотоґрафів Александра Даня, Людовіта Грушкы, Юрая Каммера, Владиміра Вайса і Мірослава Васіла захоплюють традічны архітектонічны елементы і автентічны ставебны матеріалы як часть мозаікы матеріалной културы населіня дакілько найвыходнішых сел убляньской і улічской долины.

Споминана выставка є продовжіньом векшого музейного проєкту Вігорлатьского музею з єднаков назвов, котрого заміром є посередницьтвом технічной, документарной і художной фотоґрафії захопльовати, бадати і презентовати сучасный стан традічной архітектуры в зберній области музею в Гуменнім.

В найвыходнішый основній школі на Словакії є презентована звірка фаребных фотоґрафій із романтічно-носталґічным слідом памяти лем навернутьом до їх автентічного оточіня, в котрім є документачна і художна выповідь звекшена о емоціоналный розмір. Музей тым хоче коло документованя стану традічной архітектуры вытворити прязный простор про навернутя ку коріням културной ідентіты реґіону.

„Віриме, же выбрата точка погляду докаже ословити головно молоду ґенерацію в намазі о спознаваня і всокочіня културной дідовизны і в гляданю візії практікованя того в сучасности і про будучность,“ інформовала Яна Федічова. Выставка в улічскій школі буде приступна аж до 29-го марца 2019-го року.

Жрідло фотоґрафії: Vihorlatské múzeum v Humennom.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Повязаны дописы

Польковиці 103,8 МHz
Ґорлиці 106,6 MHz