Голосник

Выставка ікон в Снині

0

Ікона – теолоґія у фарбах, таку назву має выставка, котра буде одкрыта про навщівників сниньского каштелю од 7-го марца до 31-го мая 2018-го року.

„Выставка о молитві у фарбах, о облаку до неба, медію духовности нематеріалного світа, дзеркалі орґіналу, о теолоґії у фарбах, о іконах. Но не о іконах поп арту, джезу, женьской красоты, іконічных умелців, але о сталітями здокональованых обычайно необычайных іконах. Образах мальованых на деревяных дочках, зобразуючіх сакралны темы,“ пише о выставці кураторка Даніела Капральова, котра кураторьскы выставку приготовила із Міланом Урбаніком.

Головным орґанізатром выставкы, котрой вернісаж одбуде ся 7-го марца о 17.00 год., є Містьскый културно-освітній центер в Снині i навщінвинци будуть годны посмотрити собі понад 40 ікон із 17-го аж 19-го столітя і з різных держав, в котрых жыють хрістіаны восточного обряду. В рамках вернісажі буде мож выслухати собі і лекцію православного священика проф. Др. Яна Шафіна, ПгД., котрый є деканом Православной богословской факулты Пряшівской універзіты в Пряшові і ведучім Катедры церьковной історії і візантолоґії на тій факулті. Гостьом на одкрытю выставкы буде і Церьковный хор при Православнім парохіялнім уряді в Снині.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар