Голосник

Выставка Карпатьска писанка 2019

0
Од 28-го марца до 30-го апріля 2019-го року мож в просторах Вігорлатьского музею в Гуменнім видіти XXVII. річник меджінародной конкурзно-презентачной выставкы писанок під назвов Карпатьска писаннка 2019 (Karpatská kraslica 2019).

Святочне одкрытя выставкы, котру орґанізує Вігорлатьскый музей в Гуменнім вєдно із Крайсков орґанізаційов Унії жен Словакії в Пряшові і Пряшівскым самосправным крайом одбуде ся в четверь 28-го марца о 15.00 год. і в рамках нього одпрезентує ся і ноый музичный діск присвяченый вызначній інтерпретці русиньской народной співанкы Марії Чокиновій. І то не буде єдина унікатность тогорічной выставкы.

Яєчка крашены різныма техніками з штирьох держав

„Актуалный річник події є одданьом почливости носителям културной традіції і святкованьом народной умелецькой творчости в шырокій палеті традічных і новых технік і взорів стародавного уменя,“ інформовала Яна Федічова із Вігорлатьского музею в Гуменнім.

Тогорічна колекція выставльованых крашеных яєць – сімболу Великодня, творить понад тісяч авторьскых творів, котры на выставку дало веце як сто авторів із окремых реґіонів Словакії, Україны, Польщі і Мадярьска. Меджі выставователями суть многораз оцінены авторы попередніх річників Карпатьской писанкы. Дале меджі выставлюючіма найдеме лавреатів конкурзу писанок, котрый быв орґанізованый у 2018-ім році Културным центром в польскім Перемышлю, авторів, котрых творы суть в музейнім збірковім фонді мадярьского Музею писанок в Зенґюварконі  (Tojásmuseum Zengövarkony) і понад сто писанок десятьох авторів презентує Закарпатьскый музей народной архітектуры і бываня в Ужгороді (Закарпатський музей народної архітектури та побуту).

„Выставка презентує навщівникам крашены яєчка в подобі стародавных писанок з ґеометрічныма і рослинныма взорами, но найдеме на ній і дряпанкы робелны техніков вышкрябованя, крапанкы роблены автентічнов восковов техніков і техніков восковой батікы, традічны фарблены крашанкы без взору, крашены яєчка роблены техніков обліпльованя цвернами, соломов, папірьом і різным окрасным матеріалом, яєчка крашены техніками дротованя, мальованя, мадеіры і пачворку,“ інформовала дале Федічова.

Выняткова колекція Зузаны Капральовой

Почас тогорічной выставкы Карпатьска писанка 2019 будуть навщівници годны выидіти і выняткову колекцію свсокоченого традічного крашіня яєць – писанок, із богатой тврочости вызначной русиньской писанкарькы Зузаны Капральовой (рр. 1924 – 2018) із Стащіна.

„Выставльована колекція майже стовкы писанок з автентічным, головно флоралным крашіньом, є цінным вказаньом унікатного умелецького чувства і незвычайной гармонії авторкы із природов,“ говорить о збірці Яна Федічова.

Писанкы суть доповнены збірковыма предметами етноґрафічного збіркового фонду Вігорлатьского музею в Гуменнім в подобі реплік шістьстолітньой писанкы, котра походить із Україны і образовой презентації писанок робленых традічныма техніками крашіня.

Одпрезентують і музичный діск

В рамках святочного проґраму одкрытя выставкы буде і музична часть. На вернісаж є приготовлена презентація музичного діску під назвов Співанкы Марії Чокиновой, котра вмерла у 2010-ім році у віці 63 років. На діску находять ся пісні єдной із найвызначнішых інтерпреток автентічных русиньскых співанок реґіону вышнього Земпліна в обробках музичной ґрупы Босорочкы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар