Яйця на Великден готовы! (знимкы з варштатів малюваня яєц, Ґладышів 2017)

На памятку Входу Ісуса Христа до Єрусалима, єдного з 12 головных праздників літурґічного рока, згідні з традицийом посвячено вчера в церквах багніткы і інчы зелены голузкы, а – традицийні тіж – Стоваришыня Руска Бурса орґанізувало в Квітну Неділю варштаты малюваня великодніх яєц. Писанкы, попри пасках, хріні, маслі, соли і другых, уж о нецілий тыжден трафлят до великоднього кошычка. Як свячене/свяченина вернут до каждой хыжы, де розділяна буде радіст воскресшого Ісуса Христа. Згідні з лемківском традицийом, жебы в хыжы дарило ся аж до наступного Великодня і жебы вшелеякє недобре не імало ся обыйстя, треба цілу ґаздівку трикрат обыйти з кошыком. Закля же дойдеме до оного обходжыня, треба писанкы, і не лем, зрытхувати.

Популярном серед Лемків техніком прикарашня великодніх яєц єст метода называна батканьом. То наношыня одповідньом іголком розгрітого воску на яйце, котре пак треба зафарбити. І такым як раз способом малювали яйця вчерашні варштатовичы на стрічы в Ґладышові. Бо того рока, інакше як по інчы, на запрошыня шолтыся села, Мирослава Пелехача, варштаты малюваня яєц, орґанізуваны каждий рік Стоваришыньом Руска Бурса в Ґорлицях, одбыли ся на сельскій світлици в Ґладышові. Розмалювано більше як 100 яєц во вшелеякы взоры. Варштатовичами были головні Ґлядышівяне, од юньорів по сеньорів, і жытелі сусідскых сел, але приіхали і цікавы лемківскых писанок з Ґорлиц і Ясла. На будучий рік заповіли ся вшыткы.

Про автора

Наталія Малецка-Новак
Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од штырьох років доносит о вшыткым, што ся діє на Лемковині. І не лем. Контакт: natalia@lem.fm

Коментар