Голосник

Юбілейный річник Studium Carpato-Ruthenorum

0
В неділю 9-го юна 2019-го року святочнов рецепційов в пряшівскім пензіоні Átrium одкрыють юбілейный 10-ый річник Меджінародной літньой школы русиньского языка і културы Studium Carpato-Ruthenorum 2019.

Тот рік будуть здобывати знаня з русиністікы штуденты із 5-ох держав. В понедільок будуть мати свої першы лекції.

Лекції по русиньскы і по анґліцькы

Тритыждньовый едукачный проєкт, котрый на Пряшівскій універзіті в Пряшові реалізує Інштітут русиньского языка і културы Пряшівской універзіты, є заміряный на навчаня русиньского языка, історії, літературы, културы і етноґрафії карпатьскых Русинів. Лекції з тых дісціплін паралелно забезпечують ся в русиньскім і анґліцькім языку посередництвом загранічных і домашніх высокошкольскых педаґоґів.

Як інформовала нашу редакцію Анна Плішкова, директора Інштітуту русиньского языка і културы, тот рік будуть передавати лекції із історії карпатьскых Русинів Павел Роберт Маґочій, котрый буде передавати по анґліцькы, і Володимір Фенич по русиньскы. Язык буде учіти Кветослава Копорова в русиньскім языку, по анґліцькы будуть слухати участны лекції з той дісціпліны од Марека Ґая і Патріції Крафчік. На етноґрафію по русиньскы быв покликаный Валерій Падяк, по анґліцькы ей буде передавати Патріція Крафчік.

Тот рік на літню школу приголосило ся довєдна 20 штудентів, з котрых є шість домашніх і решта зо Споєных штатів Америкы, Німецька, Чеськой републікы і Україны.

Богатый супроводный проґрам

В рамках літньой школы є про участників каждый рік традічно приготовленый і богатый супроводный проґрам. До нього належать навщівы културных подій ці екскурзії в реґіоні северовыходной Словакії.

Навщівлять наприклад Музей модерного уменя Енді Варгола, Словацькый народный музей – Музей русинськой културы, будуть годны іти на театралну пєсу до Театру Александра Духновіча, видіти деревяны церькви, выберуть ся і на Лемковину.

190 людей за 9 років

Меджінародна літня школа русиньского языка і културы Studium Carpato-Ruthenorum є єдина свойой сорты на світі, на што є Пряшівска універзіта в Пряшові горда.

За попередніх девять річників брало на літній школі участь 190 штудентів, котры были зо Словакії, Споєных штатів Америкы, Україны, Канады, Польщі, Мадярьска, а і далшых держав світа як Булгарія, Сербія, Арґентіна ці Італія. З тогорічныма штудентами їх буде вже 210.

10-ый річник Меджінародной літньой школы русиньского языка і културы Studium Carpato-Ruthenorum 2018 із публічных средств підпорив Фонд на підпору културы народностных меншын.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар