Ювілей 70-літя Петра Трохановского орґанізуваний містом Крениця

0

Як уж вшыткы добрі знают, того рока наш сучасний лемківскій поета, Петро Трохановскій, пишучий під псевдонімом Петро Мурянка, святкує 70. рік од свого народжыня. Хоц уж не раз текучого рока поета святкувал свій ювілей, так по правді ци ювілею такой особы, яком єст пан Петро, не мож бы святкувати штоден через цілий рік? Може і фізичні не было бы то можливе, але з певністю належыт ся тото нашому великому поеті, учытельови, писательови, тлумачови, великому лемківскому діячови, редакторови Бесіды та великому авторитетови для неєдной особы. Тепер пришол час на Креницю вказати, же і місто гордит ся тым, што прожыват в ним так важна і шанувана не лем серед  Лемків особа.

Зато же місто рыхтує торжественну ґалю присвячену поеті. Для нашого писателя Крениця є містом, в котрым, почавшы од 1982 р., прожыват доднес. Там не лем творит, редаґує, бере участ в лемківскых стрічах, ци даякых другых подіях прысвячених Лемкам, але тіж є великым учытельом для молодых осіб, жыючых в тым місті. Спід Його крыл вышло вельо ґенераций молодых Лемків. Я сама мала-м щестя выйти спід рукы пана Петра, котрый іщы в основній школі так мене, як і моіх ровесників вчыл лемківского языка. Великій в каждым вымірі, в котрым діє. Хоц, а може як раз зато, што народженый был уж на західніх землях, пару тыжнів по выселіню його родины з Білцаревой, докладні 10. серпня/авґуста 1947 р. заховал велику любов до своіх рідных земель, до котрых в грудни 1976 р. вернул. Том любовю, том тугом за втраченым сут пересякнены вшыткы мурянковы вершы. Мурянка, Петро Трохановскій, Великій Поета, Учытель – ріжні мож о Ним повісти, А для мене то все буде пан Петро. Пан Петро, од котрого дуже єм ся навчыла і котрый утвердил во мі тоту пошану і любов до свого.

На ювілей 70-літя Петра Трохановского горячо просит бургомайстер міста Крениця – др Дариюш Ресько. Ґаля одбуде ся 13. жолтня/октобра т.р. о 17.00 год. в Бальовій Сали Старого Здройового Дому. Вчас урочыстости выступлят ансамбль Руской Бурсы в Ґорлицях «Терочка» та амбасадорка Мурянковых пісен во світі – Сусанна.

Тоты торжествуваня повязаны будут з тогорічном XXV Лемківском Творчом Осіню. Лемківска Творча Осін то стріча русиньскых писменників з ріжных обшыри Карпатской Руси, а і тых, котры в своій творчости до Русинів навязуют. Складат ся на дводньову подію, з чого першого дня проходит в місци звязаным з річницьом, проходячом на фоні Осени, а другого дня літераты і выступлюючы артисты сходят ся в ґорлицкій Рускій Бурсі, де од років має місце завершыня стрічы з русиньском літературом в рамках Лемківскых Творчых Осени. Того рока перший ден Осени пройде як раз в Креници. Такым способом в креницким Старым Здройовым Домі выступлят поеты та писателі – участникы XXV Творчой Осени, што іщы барже збогатит рыхтувану ґалю.

Як проходила влонишня Лемківска Творча Осін, присвячена Клавдиі Алексович, почытате за тым мотузком.

З нагоды так вельох важних подій, котры проходити будут уж в найблизшу пятницю, 13. жолтня/октобра 2017 р., горячо просиме вшыткых охочых до Крениці.

Вышня знимка авторства Петра Басалыґы.

Share.

О авторі

Наталія Клинковска

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.