Голосник

З послідньой хвилі: Андрий Копча ведучым СЛ мінімум до 2025 рока!

В Ліґници проходит VIII Конґрес Стоваришыня Лемків, а мы приносиме першы занавісовы інформациі, до якых неофіцияльно дотерла підредакция Фафринді вчас кавовой павзы. Як сме ся дознали од анонімового інформатора, неформально завязана ініциятивна ґрупа рыхтує далеко ідучы зміны в статуті.

Наш інформатор, якій з очывидных причын не хоче выявити своіх персоналий (дозволил лем сфотоґрафувати плякєтку неформальной ґрупы – смотрте пониже), бесідує, же плянувана єст радикальна зміна в статуті орґанізациі, в котрій ведучый буде выбераный дожывотно. Уж тепер каденция ведучого Андрия Копчы продолжат ся 30 років, зато – як дознаєме ся дальше – пару років в тоту, або другу сторону не зробит никому ріжниці, а по правді нагла зміна на функциі ведучого выкликала бы більше недорозумлінь і великій непорядок, аж і хаос. Зато і, попри дожывотным менуваню ся як почестный ведучый, Андрий Копча задеклярувал быти шефом СЛ мінімально до 2025 рока, то єст до празднуваня ювілею столітя 1925 рока.

Надіючы ся, же чытачы розуміют повагу ситуациі і вплыв описаных радикальных змін на світове русинство, інформуєме, же підредакция Фафринді мало коли провірят своі джерела і сама ся фест чудує, коли ся они пак вкажут правдивыма.

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментарі