Голосник

Зачінать Studium Carpato-Ruthenorum 2018

0
Вже тот вікенд зачнуть сходити ся до Пряшова штуденты 9-го річника Меджінародной літньой школы русиньского языка і културы Studium Carpato-Ruthenorum 2018. Тот рік будуть здобывати знаня штуденты із 6-ох держав. В понедільок одбуде ся їй святочне отворіня.

Тритыждньовый едукачный проєкт, котрый на Пряшівскій універзіті в Пряшові реалізує Інштітут русиньского языка і културы Пряшівской універзіты, є заміряный на навчаня русиньского языка, історії, літературы, културы і етноґрафії карпатьскых Русинів. Лекції з тых дісціплін паралелно забезпечують ся в русиньскім і анґліцькім языку посередництвом загранічных і домашніх высокошкольскых учітелів. Тот рік лекції будуть передавати Павел Роберт Маґочій, Елена Будовская, Патріція Крафчік, Валерій Падяк, Володимір Фенич, Марек Ґай, Кветослава Копорова і Зденка Цітяркова.

Частьов проєкту є множество супроводных културных подій і познавачі екскурзії в реґіоні северовыходной Словакії. Участны знова навщівлять наприклад Музей модерного уменя Енді Варгола, Словацькый народный музей – Музей русинськой културы, будуть годны іти на театралну пєсу до русинського професіоналного Театру Александра Духновіча, видіти Дуклю ці деревяны церькви, котры находять ся на тій теріторії.

Тот рік бы мали літню школу абсолвовати штуденты із 6-ох держав, конкретно із Канады, Споєных штатів Америкы, Польщі, Україны, Мадярьска і домашньой Словакії. Довєдна бы їх мало быти 22. Но навчалный процес на літній школі є одкрытый нелем про вшыткых штудентів Пряшівской універзіты, а і про інтересуючіх ся з мімоуніверзітного середовиска.

За попередніх вісем річників літню школу абсолвовало 168 штудентів, котры были зо Словакії, Споєных штатів Америкы, Україны, Канады, Польщі, а і далшых держав світа як Булґарія, Сербія, Арґентіна ці Італія.

Першы лекції тогорічной літньой школы одзвучать на Пряшівскій унверзіті в понедільок 11-го юна 2018-го року. Як раз в тот день русиньскый інштітут запрошать і на святочне отворіня лінтьой школы, котре зачне о 18.30 год. в просторах Їдалні высокошкольского інтернату Пряшівской універзіты.

9-ый річник Меджінародной літньой школы русиньского языка і културы Studium Carpato-Ruthenorum 2018 із публічных средств підпорив Фонд на підпору културы народностных меншын.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар