Засідав Округлый стіл Русинів Словеньска

0

В суботу 2-го децембра 2017-го року проходило вже 24-те засіданя Округлого стола Русинів Словеньска. Засіданя одбыло ся в просторах Словацького народного музею – Музею русиньской културы.

Платформа діскутовала о пріорітах і алокації фінанчных средств із Фонду на підпору културы народностных меншын на рік 2018 і єдночасно приготовила мануал про старостів сел, котрый має помочі при приготовліню і реалізації културных актівностей. ОСРС в суботу говорив і о іщі все проходячім юбілейнім Році Адолфа Добряньского, ці о припомянутю собі 100-ой річніці выникнутя сполочной державы Чехів, Словаків і Русинів – 1-ой Чехословацькой републікы.

Пріоріты в проєктах і мануал про старостів

Єдным із основных пунктів суботнього засіданя была діскузія о пріорітах і алокації фінанчных средств. Петро Штефаняк, котрый є того часу директором радіа русин ФМ і єдночасно ведучім Фолклорного ансамблю Рутенія, приготовив і одпрезентовав модел на перерозділіня фінанцій із Фонду на підпору културы народностных меншын на рік 2018. Штефаняком презентованый модел быв першов верзійов, котра по діскузії на суботнім засіданю буде доповньовати ся і управльовати.  У своїм моделі акцентовав, жебы проєкты, котры ся будуть підтримовати, служыли головно на заставліня вытрачаня ся русиньского языка ці піднятя чісла людей, котры ся ку Русинам будуть голосити. Споминаны цілі бы мали быти забезпечены так, же при проєктах буде ся смотрити на русиньскы пріоріты, котрыма будуть розвиток школства, розвиток медій, културны події із акцентом на русиньске усвідомліня ці робота з молодежов.

На задісаню веце членів выразило ся ку моделу, котрый быв выпрацованый Петром Штефаняком і ОСРС ся доїднав, же позначкы членів будуть автором моделу закомпонованы до офіціалной верзії, котру буде ОСРС просаджовати.

Платформа так само, як было обіцяне председом ОСРС Яном Липиньскым, в суботу одпрезентовала мануал під назвов „Приготовліня і реалізація културных актівностей про старостів русиньскых сел“. Мануал, котры має помочі старостам быв написаный Світалнов Хомов і быв загнаны вшыткым старостам русиньскы сел як методічна поміч.

Юбілей кінчіть і зачінать

ОСРС оцінив на своїм засіданю дотеперь зроблены події в рамках Року Адолфа Добряньского, котрый быв тов платформов выголошеный із нагоды 200-ой річніці народжіня вызначного русиньского політіка і реформатора. Єдночасно были членове інформованы, же в Пряшові буде в день його народжіня, 18-го децембра 2017-го року, одкрыта памятна табла, котра бы ся мала находити в Руськім домі на Главній уліці.

Вже теперь Русины рихтують ся на далшый юбілейный рік, кідже в році 2018 будеме припоминати собі 100 років од заснованя 1-ой Чехословацькой републікы, сполочной державы Чехів, Словаків і Русинів. В рамках того была выменована робоча ґрупа, котра буде коордіновати і ініціовати актівности повязаны із тым юбілейом. До робочой ґрупы были менованы Олґа Ґлосікова, директорка Словацького народного музею – Музею русиньской културы в Пряшові, Ян Липиньскый, Петро Медвідь, Петро Штефаняк і Петро Кімак-Фейко.

Діскузія о методіці про перепис населіня

Петро Медвідь як член Выбору про народностны меншыны і етнічны ґрупы за русиньску народностну меншыну на Словакії інформовав на кінцю засіданя участных о тім, же Словакія робить на новій методіці, подля котрой ся буде робити перепис населіня в році 2021. Подля першых інформацій бы нова методіка мала мати і можливость писати собі дві народности.

Тото представителі Русинів беруть за крок, о котрім треба выкликати шыроку фахову діскузію в рамках представителів меншын, кідьже зо собов може приносити і неґатівны наслідкы. Зато представителі Русинів у народностнім выборі будуть таку діскузію ініціовати з тым, же заженуть компетентным орґанам позіцію русиньской народностной меншыны односно той темы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.