Голосник

Завершыня будовы експресовой дорогы С3 Польковиці-Любін

Штырі фірмы зголосили ся, жебы докінчыти розгребану будову 14-кілометрового одтинка С3 з Польковиц до Любіна. Інвестиция мала быти реалізувана пят років, але є превеликє опізніня.

В понедільок Ґенеральна Дирекция Державных Доріг і Автострад отворила оферты на завершыня розгребаной будовы 14-кілометрового одтинка експресовой дорогы С3 з Польковиц до Любіна. Інвестор на зробліня м.ін. дороговых розвязок Казмєжів, Польковиці і Любін Пілніч плянує передати 211 млн зл. Охочы сут.

Будова тырват уж пят років

Новый выконавця буде мал 12 місяци на докінчыня робіт, не враховуючы зимового періоду. Кажда з фірм, котра зложыла оферту: Mota-Engil Central Europe, Masfalt i Drogomex (запропонували 228 млн зл), консонрция Предприємсто Будовы Доріг і Мостів Кобылярня і Мірбуд (236 мнл зл), Budimex (258 млн зл) та Strabag (294 млн зл), деклярує, што скоротит час робіт о два місяці.

Будова дорогы з Польковиц до Любіна тырват уж пят років і мала быти скінчена в червци/юнію минулого рока. ҐДДДіА кінцьом квітня/апріля одступила од умовы з консорцийом фірм Salini і Pribex, якы мали побудувати дорогу, бо выконавця не тримал ся пляну робіт і не платил підвыконавцям. Тоты збунтували ся літом 2017 рока, блокували інвестицию, пак зачали сходити з будовы. На конец сконфліктували ся зо собом обі фірмы Salini і Pribex, в результаті чого заперто будову. Італийці в марци зажадали од ҐДДДіА додатковых 449 млн зл за роботы на вшыткых одтинках в державі, а за тот з Любіна до Польковиц – 100 млн зл. Грошы не отримали, а опізніня росло.

Буде фінал?

Власти Любіна і Польковиц, змучены продолжаючом ся будовом, писали в справі незавершеной будовы дорогы до премєра Матеуша Моравєцкого, жебы приспішыти процедуры, што дозваляют выбрати нового выконавцю. ҐДДДіА в найблизшым часі проаналізує зложены оферты і рішыт, ци до найтуньшой доложыт бракуючу квоту – 17 млн зл.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі