Голосник

Земан прияв Русинів. Підтримує теріторіалну цілость Україны, говорить Овчачек

3-го септембра 2019-го року презідент Чеськой републікы Мілош Земан офіціално прияв на Пражскім замку делеґацію підкарпатьскых Русинів. Говорили о Русинах в Чеській републіці і Міньскых договорах.

Як інформовав оіфіціалный сайт чеського презідента, Земан прияв Василя Джугана, председу Всемірного совіту підкарпатьскых Русинів. В делеґації Русинів із Підкарпатя были і Михаіл Тяско, Димитрій Сидор, Іван Данацько, Адндрій Фатула і далшы.

З Русинами є історічне одношіня

Їжі Овчачек, директор Пресового одділіня і пресовый гововрця презідента Чеськой републікы нашу редакцію інформовав, же стріча одбыла ся із нагоды сторічніці од підписаня мірного договору в Сен-Жермен, чім втогдышня Підкарпатьска Русь стала частьов Чехословацькой републікы. Договор быв підписаный 10-го септембра 1919-го року. Овчачек конштатовав, же Чеська републіка має вдяка тому історічны односины з Русинами.

Русины, як інформовав русиньскый гражданьскый актівіста Івана Данацько, од презідента „нич не просили, а подаровали образ Я. Дуленкова Вид на міст Масарика.“ Так само передали подяку за залишену по Чехах архітектонічну дідовизну од мера (пріматора) Ужгорода Богдана Адрієва і депутатьского корпусу Закарпатьской областной рады.

Бісідовали о робочім рынку і Міньскых договорах

Як інформовав говорця Овчачек, презідент Земан в розговорі із представителями Русинів на Пражскім замку інтересовав ся передовшыткым і їх сітуацію в Чесьскій републіці і уплатніню на робочім рынку в тій державі. Русины презідента інформовали і о жывоті Русинів у Закарпатьскій области Україны.

„В діскусії быв спомянутый і вопрос Міньскых договорів, котры рахують з децентралізаційов Україны. Пан презідент єдночасно підкреслив, же повно підтримує і має в почливости теріторіалну цілость Україны,“ додав Овчачек.

О Русинах зо Зеленьскым?

По стрічі підкарпатьскых Русинів з презідентом Земаном в російскых і україньскых медіях зачали ся пошырьовати інформації, же презідент Чеськой републікы приобіцяв делеґації, котру вів Джуган, говорити з презідентом Україны Володиміром Зеленьскым на тему Русинів.

На вопрос, ці таке приобіцяня з боку чеського презідента зазвучало, його говорця одповів лем так, же в припаді, кебы ся стрітив Мілош Земан з Володиміром Зеленьскым, вопрос Русинів бы быв самособов можливый, і вдяка споминаным історічным односинам Чеськой републікы ку Русинам. Приобіцяня одкрыти тоту тему Овчачек не потвердив.

Жрідло фотоґрафії: Miloš Zeman – prezident České republiky.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі