Голосник

Жеґєстів в меджевойню

0
В найблизшым тыжни, 14. листопада/новембра 2018 р., одкрыта буде дальша выстава архівальных фотоґрафій, вказуючых давний Жеґєстів і шырше надпопрадску долину того реґіону Лемковины.

Выстава одкрыта буде о 17.00 год. в просторах одділіня Публичной Бібліотекы Міста і Ґміны Мушыны в Жеґєстові. Є она такой продолжыньом зачатого циклю выстав, присвяченого надпопрадскій долині. Влони тот сам орґанізатор зрыхтувал выставу, яка презентувала село на архівальній знимці. Пак початком текучого рока зрыхтувана была выстава фотоґрафій Павла Дуляка, на якій мож было видіти сучасны пізріня локального фотоґрафіка на красу найменьшого здрою в Польщы, якым є Жеґєстів. В квітни/апрілю 2018 р. вказана была так само выстава архівальных знимок.

Хоц тема будучой выставы невельо ріжнит ся од темы попередніх, орґанізаторе єй заузили. Найблизша буде про Жеґєстів в двадцетлітю меджевоєнным. Є она підпорена Міністерством Родины, Працы і Соспільной Політикы Польской Республиы.

Жеґєстів як русиньскє село на Лемковині находит ся такой на граници з Пряшівском Русю. Хоц автохтонных жытелів ніт, Жеґєстів надале є місцьом асоциюваным з Лемками, головно для польскых курортників, якы приходят в тоту част західньой Лемковины до здрою з долгом традицийом, зачынаючом ся як раз в меджевойню.

Вельо архівальных фотоґрафій публикуваных є на сайті здрою.

фот. грекокатолицка церков св. Михала / Жеґєстів

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар