ЗІРС одпремєрує новый філм Русинах присвяченый сторічніці 1. ЧСР

0

Здружіня інтеліґенції Русинів Словеньска приходить з новым документарным філмом під назвов В хападлах міцных світа. Битва підкарпатьскых Русинів о місце в родині европскых народів. Філм є присвяченый юбілею, котрый ся буде святковати в році 2018. Як раз втогды буде сторічніця од заснованя сполочной державы Чехів, Словаків і Русинів – 1. Чехословацькой републікы.

„Зъїзд Народных комітетів прияв Маніфест о выступліню із Чехословакії і о ‚зновазъєдиненю‘ Закарпатьской Україны зо совітьсков Українов. Было ясне, же зъїзд і його узнесіня проходять під досконалов режійов Совітів. Атмосфера, котра ту пановала, знеможньовала высловити іншакый погляд і каждый, хто бы быв несогласный, рісковав небезпеченство перзекуції. Не є похыбностей, же текст Маніфесту зродив ся в кремельскых кабінетах. О жаднім зновазъєдиненю не могло быти ани бісіды, Підкарпатьска Русь історічно ниґда не была частьов Україны…,“ пише ся в анотації філму.

Думку новому філму знова дав Ян Липиньскый із Здружіня інтеліґенції Русинів Словеньска, котрый вже робив на дакілько філмах присвяченых русиньскій історії і їй особностям. Режію мав в руках уж дворный режісер філмів ЗІРС-у Іґор Сивак.

В хападлах міцных світа є погляд на Підкарпатьску Русь як часть нововыникнутой державы – Чехословакії. Дашто сьме уж назначіли у філмі Душы Карпат, но теперь тоту подію зображаме детайлно. Філм зачінаме тым, же є ту велика біда, безробітность, нашы Русины одходжають до Споєных штатів Америкы. Но Русины в США уж суть на высшім рівню, рішають будучность нашого краю, в плебісціті выберають єдну із алтернатів – приєднаня до Чехословакії. Во філмі слідуєме вплив великодержав на тоту теріторію. Підтримку Гітлера україньскым аутономістам, окупацію южных теренів і пізніше забратя Підкарпатьской Руси Мадярями, пак освободжіня Совітьсков армійов і анексію Підкарпатьской Руси Совітьскым союзом,“ говорить о філмі Липиньскый.

Премєра нового філму одбуде ся в Конґресовім центрі Універзіты Коменьского, на Штудентьскых інтернатах Дружба, уліця Botanická 25, в Братіславі дня 13-го децембра 2017-го року зо зачатком о 17.00 год.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.