Голосник

Значкы коло драг можуть быти двоязычны

0

Дорожны значкы в селах з меншыновым жытельством можуть быти на Словакії двоязычны. В четверь 15-го януара 2018-го року о тім, як пише словацька державна пресова аґентура TASR, інформовали представителі партії Most-Híd.

„Зліквідовали сьме адміністратівны барьєры про поступне запроваджіня двоязычных дорожных значок з текстовым написом,“ повів у четверь на пресовій конференції в Братіславі владный уповномоченый про народностны меншыны Ласло Буковскый. За його словами має іти о значкы заказовы, приказовы, значкы інформатівного характеру, напрямовы ці додатковы табліці. Буковскый є пересвідченый, же тоты зміны суть величезным успіхом про меншыны. Запроваджіня двоязычных значок буде залежати од інтересу і фінанчных можливостей. Цілково ся можливость дати двоязычны значкы дотулять 600 сел на Словакії, в тім чіслі і русиньскых.

Буковскый на пресконференції припомянув і позмінюючу пропозіцію ку недавно схваленому закону, котрый рішыть сітуацію тзв. нафункчных сел. Депутат Народной рады Словацькой републікы за партію Most-Híd Петер Антал просадив, жебы ся при приєднаню нефункчного села брав до увагы і народностный склад села, котре ся має приєднати ку сусідньому селу. На потребу закомпоновати до закона народностный прінціп як першый звернув увагу Округлый стіл Русинів Словеньска.

Підпредседа партії і владный уповномоченый про ромскы комуніты Абел Равас на пресконференції оцінив крокы, котры ся в остатнім часі подарили. За його словами партія Most-Híd робить на тім, жебы зміцнити позіцію меншын на Словакії. Вказав і на намагу, жебы телефонічна лінка 112 давала поміч і в языках меншын.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар