Голосник

Знаме уж темы Карпатскых Стріч на 2018 рік

0

Пару дни тому явили ся темы Карпатскых Стріч на 2018 рік.

Карпатскы Стрічы вернули по річній перерві і проходят в каждий третій четвер місяця о 18.00 год. в Музею Землі ПАН в Варшаві. О тых заплянуваных на тот рік уж сме інформували, а уж тепер можеме подати і темы стріч, котры будут проходити од січня/януара до мая 2018 рока:

– 18. січня/януара 2018 р., Марцін Пжыбыла – Важны одкрытя в преісторичній осаді на Горі Зындрама,

– 15. лютого/фебруара 2018 р., Анджей Ґліва – Татары, проклятя карпатскых сел,

– 15. марця 2018 р., Домінік Ксєнскій – Карпаты 2017,

– 19. квітня/апріля 2018 р., Збишек Кашуба – За гором – істория церкви в Лопянці – вернісаж выставы,

– 17. мая 2018 р., Люцина Шанявска – Карпаты на найстаршых картах Европы і Польщы.

Перша Карпатска Стріча 2017 уж за нами. Проходила она близко тыжден тому, 19. жолтня/октобра, і была присвячена часописови «Плай», котрий того рока святкувал свій 30. ювілей. Стрічы товаришыл вернісаж выставы «Плайови оповісти, значыт три декады з Карпатскым Альманахом». Выстава рахує 16 плянш, якы приближают історию, обставины возникніня пілрічника, а тіж передставяют некотрых його авторів і найважнійшы темы, котрыма ся занимано на його картах. Серед тых плянш явили ся і дві про Лемковину – на них мож было найти м.ін. знимкы двох важных персон сучасного лемківкого світа – др габ. Олены Дуць-Файфер та Антония Крога. Презентацию вюл редактор часопису, Анджей Вєльоха. Выставу мож обзерати в Музею Землі ПАН до кінця того рока, тіж вчас найблизшых Карпатскых Стріч, 16. листопада/новембра і 14. грудня/децембра.

Шеруй.

О авторі

Наталія Клинковска

Коментар