Голосник

Зо Смереківця до Відня

22. квітня проходит річниця смерти Юлияна Пелеша – єпископа, доктора теолоґіі, історика церкви, теоретыка і практыка богословія.

Вродил ся Ю. Пелеш 3. січня 1843 рока в Смереківци на Лемковині в родині учытеля Григория і Югаскы Щавиньскых. До основной школы ходил в Яслі, а до ґімназиі в Пряшові і Перемышли. Філософічно-теолоґічны студиі провюл в Відни. 20. жолтня 1867 рока был высвячений на грекокатолицкого священника і призначений на префекта грекокатолицкой семінариі в Відни. Продолжувал в тым часі студиі і в 1870 році отримал званя доктора теолоґіі.

В роках 1870-1872 был префектом в грекокатолицкій семінариі во Львові, законоучытельом в монастырі ормяньскых бенедиткинок та адюнктом при катедрі пасторальной теолоґіі на Львівскым Університеті. През два рокы был тіж працівником в Духовній Семінариі в Перемышли. В 1874 році зас вернул до Відня. Там остал парохом парафіі св. Варвары і ректором Руской Семінариі. В 1883 році зас нашол ся во Львові, а 12. лютого 1885 рока цисар Франц Осиф ІІ назначыл го першым єпископом новооснованой грекокатолицкой станіславской єпархіі. В 1891 р. перенесений на грекокатолицкє єпископство в Перемышли.

В тым часі, коли пробывал в Відни, был домашнім учытельом наступці австрийского цисаря – арцикнязя Рудольфа. Вславил ся як оборонця східнього обряду на Львівскым Синоді (1881 р.). Лишыл по собі значучий науковий доробок. Печатал во Львові ґазету “Рускій Сіон”, в якым заміщал своі статі.

фот. wikipedia.org

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі