Тогорічна 23. Костельникова Осін помаленькы ближыт ся ґу своій реалізациі. Войводиньскій культурний фестіваль буде тырвал тыжден – од 18. до 26. листопада/новембра т.р., і пройде в парох місцевостях, в котрых жыют Русины. Подія пройде – за порядком – в Рускым Керестурі, Кули, Дюрдьові та Коцурі. Такє рішыня піднял Орґанізацийний Комітет Костельниковой Осени, котрий зобрал ся на засіданя 1. листопада/новембра т.р. в Домі Культуры в Рускым Керестурі. Тогорічний проґрам 23. Костельниковой Осени одбуде ся м.ін. при спілпрацы з керестурском ґімназийом ім. Петра Кузмяка та редакциі «Рускє Слово». 23. едиция подіі буде присвячена 130. річниці народжыня Гавриіла Костельника.
Подібні як влони, тогорічна Костельникова Осін зачне ся в школі ім. П. Кузмяка в Рускым Керестурі. То там одбуде ся промоция новых выдавництв для діти та другых, выдаваных «Рускым Словом». Шкільна молодіж зрыхтує на тоту хвилю принагідну історичну выставу. В тот сам ден, 18. листопада/новембра, в ресторані «Червена Ружа» в Рыскым Керестурі одбуде ся дальша промоция книжок та одкрытя выставы пн. Приватний жывот Русинів авторства Сашы Сабадоша і Заводу за Культуру Войводиньскых Русинів. При пруситности авторів та рецензентів заплянувано презентацию вшыткых тогорічных выдавництв «Руского Слова».
Другій ден (19.11) Костельниковой Осени пройде в Кули, де традицийно одбуде ся стріча рецитаторів з Войводины, а о ден промоция поєдных новых книжок пройде в Дюрдьові. Віторок (22.11) і четвер (24.11) то уж подіі в Коцурі. Перша з них орґанізувана єся при спілпрацы Дому Культуры, Етно-Клюбу «Одняте од забуца» та локального одділу Руской Маткы. Буде то выстава о темі «70. річниця кольонізациі», а пак літературно-музычний вечер. Четвер в Коцурі то презентация новых выдавництв про русиньскы діти. Послідній ден 23. Культурного Фестівалю Костельникова Осін пройде в Рускым Керестурі. Окрем выставы фотоґрафій і другых активности, вчас музычной части подіі, книжкы будут представляти Танита Ходак та Саша Палінкаш.
фот. і інфо. за Рутенпрес