Видит ся, што не єст аж таком таємницьом тото, одкале є яйце, або тото, же молоко то з дакус інчого джерела як картон в латы ся бере. Але чом олій ся бє, а не вытискат? І што має до того таран? А на кілько способів мож молотити зерно? І ци: «о! пляцок» то тото саме што «опляцок»?
Кєд знате одповіди на вшыткы звіданя, то варштаты не для вас, хоц в часі іх тырваня дознате ся о вельо веце. Заран, 17. вересня/септембра 2020 р., в Лемківскій Едукацийній Загороді в Ґладышові стартуют дармовы варштаты, предовшыткым для діти і молодежы. «Кєд іде о молодіж, то тота границя віку не єст до кінця окрислена, як ся хтоси чує молодо, то значыт, же є молодіж» – жартує Ваньо Дзюбина, властитель Едукацийной Загороды в Ґладышові, головный інструктор варштатів.
Музей не до обзераня, а до практикуваня вшыткого
«На варштатах буде мож познати дакус інформаций з культуры і істориі Лемковины, а практичны занятя звязаны будут з зерном, млинарством, кус з робліньом олію, ниток з лену, зробиме тіж даку лжыцю або ґонт з дерева, ци забавку, бо діти дома давно не лем мусіли помагати, але тіж ся кус і бавили» – вычыслят темы варштатів В. Дзюбина. Кєд будут охочы, то буде мож тіж в практиці провірити, як то было варити на шпаргеті, і буде мож зрыхтувати штоси до ідла.
Лемківска Едукацийна Загорода в Ґладышові выникнула перед близко семома роками. Є реконструкцийом традицийной лемківской забудовы. Складат ся з типовой хыжы (в котрій найдеме част до мешканя і тоту ґаздівску), двох шпіхлірів, ориґінальных вітровых млинів, єст і студня з журавльом і кєрат. В поміщынях найдеме давне ґратя і нарядя, котры хоснуваны сут вчас презентаций і варштатів. Властителі, Ваньо і Данута Дзюбины, то емеритуваны учытелі, якы самы, будучы Лемками, мают великє знаня про лемківску історию і традициі реґіону. Охочо ділят ся ним з заінтересуваныма.
Буде мож запрезентувати ся і в радию
«На конец варштатів плянуєме оголосити конкурс на оповіданя пн. Мій ден в лемківскій загороді» – заохочує В. Дзюбина. Найбарже інтересуюче оповіданя буде пак запрезентуване на антені радия ЛЕМ.фм. «Задумали сме то так, жебы діти списали своі вражыня одраз по варштатах, того самого дня, коли найвеце памятают, а оціниме іх, аж як пройдут вшыткы варштаты. Разом плянуєме приняти коло 130-140 діти» – дополнює властитель загороды. Кєд дахто буде хотіл написати дома і дослати пізнійше, то тіж буде така можніст.
«До варштатів не треба ся нияк рыхтувати, вшытко забезпечаме на місци. Треба лем мати отверту голову і вельо позерати» – запрашат Ваньо Дзюбина.
Реалізация варштатів можлива є завдякы фінансовій підпорі Міністра Внутрішніх Справ і Адміністрациі. «Рік тому внесок о варштаты до міністерства помагал нам писати бл. п. Богдан Ґамбаль і в даякій мірі то йому, його памяти хотіли сме іх посвятити. Як єм ся остатньо здогадал, то вказало ся, же знали сме ся аж 40 років» – додає.
Інчы атракциі
Лемківска Едукацийна Загорода находит ся в самым серци Ґладышова, близко ліса, лук, отвертых просторів з горами на горизонті. Вірні одтворены будинкы і выпосажыня творят неповторный климат, котрый спричынят, што мож ся досправды почути як в давній бабиній і дідовій хыжы.
Околиця служыт пішій ци роверовій туристиці, а зимом ізджыню на лыжах. В сусідстві є множество атракций і памяток істориі, як прим. церкви і костелы зо Шляку Деревяной Архітектуры, цмонтері з І світовой войны, туристичны пути, Маґурскій Нацийональный Парк, резервуар в Климківці ци курорт з мінеральныма водами в Высовій.
Веце дрібниц про варштаты і контакт до орґізаторів найдете на офіцийным сайті Дзюбинівкы або на фанпейджы на ґамбокнижці.