Голосник

Сумар дня на 18. марця 2020 р.

Приносиме вам сумар медияльной ґрупы ЛЕМ.фм+ на ден 18. марця 2020 р.


Лем через Барвінок і Хыжне

В звязку з пандемійом коронавіруса поєдны державы постепенно заперают своі границі. Перед парома днями своі переходы закрыла Словацка Республика і Польща. Самособом закрыты сут переходы, котры лучат Лемковину з Пряшівском Русю. Границю мож перейти лем в вынятковых ситуациях. На граници медже Польщом і Словацийом находят ся векшы і меншы переходы. Дотепер найбільшый рух на пасмі Лемковина-Пряшівщына был в такых переходах як Барвінок-Вышній Комарник, Конечна-Бехерів ци Мушынка-Курів. Але окрем них одкрыты были дотля і меншы переходы. Вшыткы они на днес сут стережены граничныма службами. Границю медже Польщом і Словацийом мож в вынятковых ситуациях перейти лем переходом Барвінок-Вышній Комарник (державный пут но. 19) і Хыжне-Tерстяна на Ораві (державный пут но. 7). Перейти до Польщы можут м.ін. польскы громадяне, котры хочут вернути з заграниці, а тіж чужынці звязаны з Польщом в професийный або родинный спосіб. Подібны вымогы окрислила Словация. Заєдно вшыткы, котры войдут на обшыр Польщы, мусят піддати ся 14-дньовій домашній кварантанні.

Лемківскє весіля, Лемківска Надія і етноГОРНЕЦ

Нацийональный Центр Культуры оголосил результаты набору до проґраму ЕтноПольща 2020. Дофінансуваня отримат 293 внескодавців – серед них сут стоваришыня, орґанізациі та інстутуциі культуры. Разом то 10 млн зл на реалізацию задач з обшыри реґіональной едукациі та популяризациі материяльной і нематерияльной культуровой спадковины. Проґрам Нацийонального Центра Культуры закладат дофінансуваня задач, якы зміцняют культурову достоменніст, але сут реалізуваны в місцевостях, якы чыслят не більше як 50 тис. жытелів. До проґраму зголошено аж 1264 внескы. Серед тых позитивно оціненых находят ся і такы, якы популяризувати будут лемківску культуру – Стоваришыня Під Карпатами з Коросна достало 14 тис. зл на запрезентуваня традиций і того, што сучасне, звязаных з лемківскым весільом, Товариство Пошырюваня Традициі і Культуры Лемків (орґанізация з Крениці) отримало 18 тис. зл на реалізацию проєкту пн. «Лемківска Надія», a Осередок Культуры Ґміны Ґорлиці буде презентувал лемківску і погіряньску культуры в рамках проєкту етноГОРНЕЦ, на котрый достал фінансуваня в квоті 51 тис. зл.

Буде проблем з медом

На полудни Польщы більшіст пчіл лишат уж улиі, але овады сут в слабій кондициі. Вчас тогорічной зимы выгынуло середньо 30% пчолячых родин. Причыном был брак зимы та брак низкых температур, што влияло на розвиваня ся варрозы – хвороты, яку выкликуют паразиты пчіл. Є то на тот момент найгорознійша хворота пчіл на цілым світі. Спричынят вельо страт. В оціні презеса ряшівского Воєвідского Звязку Пчолярів – Тадеуша Дыльона, одбудова шкід, котры спричынила варроза серед пчолячых родин, потырват цілый найблизшый сезон, а то значыт, што може быти зобрана менша кількіст меду. Некотры пчолы того рока зберали уж нектар з квітя ліщыны. Овады лишают улиі, коли є сонечні і температура повітря є більша як 10 градусів.

Котре село Лемковины найкрасшым?

Малопольскє Воєвідство оголосило набір до конкурсу «Малопольскє Село 2020». Преміі признаваны будут в трьох катеґориях: «Найкрасше Малопольскє Село», «Новаторскє Малопольскє Село» та «Малопольскє Село в Сіти». Тогорічна едиция буде уж четвером, в рамках котрой гляданы будут найбарже чудовы закутины полудньовой Польщы. На зголошыня максимальні двох шолтыств ґміны мают іщы місяц, значыт до 17. квітня/апріля. Того рока пуля нагорід то аж 540 тис. зл. Віцемаршалок Лукаш Смулка в запрошыню до конкурсу бесідує, што власти хотят видіти, чым жыє локальна соспільніст, чым може быти горда, а тым самым заохотити туристів до обізріня урокливых місц реґіону Малопольщы. Головном цілю конкурсу є выріжнити тоты шолтыства і жытелів, котры активні діют, жебы піднести атракцийніст місця, в котрым мешкают. Оцінювана буде естетика даного села, утриманя його просторового і архітектонного порядку та діяня для охороны культуровой спадковины. До увагы браны будут і ініциятивы, котры підперают локальну достоменніст і інтеґруют мешканців.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі