Голосник

На міністерстві выникне одділіня про освіту народностных меншын

Одділіня про выхову і освіту народностных меншын бы мало в другій половині місяця юн 2016-го року выникнути на Міністерстві школства, наукы, досліджіня і шпорту Словацькой републікы. Про словацьку аґентуру SITA то в інтервю повів державный секретарь того міністерства Петро Крайняк. Выникнутьом того одділіня хотять рішыти проблемы, о котрых їх інформують школы із навчалным языком народностных меншын.

Державный секретарь выразив ся і ку рамковым навчалным планам. В сучасности існує різніця в кількости годин навчалного языка в школах з навчалным языком словацькым і з навчалным языком народностных меншын. В школах з навчалным языком словацькым є тыжденно 31 годин словацького языка і літературы в першых штирьох класах основной школы. В основных школах з навчалным языком народностных меншын є од першой класы по четверту тыжденно на навчалный язык і літературу лем 21 навчалных годин. Крайняк підкреслив, же рамковы навчалны планы мусять зодповідати потребам меншыны і мусять брати до увагы і якость навчаня.

Резорт школства ся подля списку задач на тот рік має заміряти на веце областей в контексті народностных меншын. Задачов міністерства на тот рік є і выпрацованя концепрції розвитку навчаня русиньского языка і културы в матерьскых, основных і середніх школах. Так само має міністрство тот рік выпрацовати і навчалный текст про другый ступінь основных школ о історії і културі народностных меншын в Словацькій републіці.

Фотоґрафія: ujszo.com

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі