Штефан Валевскій – про архітектуру, горы і жытя – проґрам «70 процент» – понедільок, 20.00 год.

Лемко лем в горах чує ся правдивым чловеком, а кєд Лемко єст архітектом ― то найліпше йому ся поведе запроектувати объєкты в горах.

Такым же архітектом єст Штефан Валевскій: найліпшы річы, якы створил, сут в Карпатах. Раз в жытю мал нагоду запроєктувати дашто в лемківскій іх части. То мал быти комплекс Центру лемківской культуры в Ждыни. Доднес му шкода, же тото не было зреалізуване…

Штефан Валевскій вродил ся в 1932 р. в Бодаках, а більшу част жытя прожыл в Івано-Франківску. Але… при каждій нагоді іхал в горы. Літом, зо своіма товаришами-архітектами вандрувал по гірскых путиках, в зимі іздил на нартах, бо тот вид спорту то тіж його пасия. А іщы єдна пасия, з яком ішол ціле жытя ― то пісня. Коли почул, же в Івано-Франківску орґанізуют лемківскій хор, одраз полетіл і вписал ся, а пак вписал іщы жену і дівку.

Але што вам буду вшытко оповідала?! Слухайте нашу передачу. Лем майте на увазі, же днеска бесідуєме по украіньскы.