«Слово» – Друга постна неділя – неділя, 9.00 год.

Ісус приходить до Капернаума де ся зышло тілько народа, же не было міцся при дверях. Четверо мужів приношають невладного паралітіка. А коли не можуть через двері, выходять на стріху і спущають через діру котру перебили на повалі. Ісус видить їх віру і выздравлює невладного, но наперед на душі (одпущають ся ті гріхы) і аж так на тілі. Бер свою постіль і ідь. Тым і нас учіть, абы наперед памятати на свою душу, котра є бессмертна, і аж так на здравя тіла. А тоты четверо нас учать, же є потрібно мати перед собов єден ціль. Тым цільом мать быти Хрістос. Дорога ку тому цілю не є все легка, суть різны перешкоды, котры нас сперають. Но не треба вздавати ся, але іти напрік тым перешкодам ку цілю, і ку тому є потрібна і терпеливость. Крок за крочком прямовати. І як раз средством ку тому є доба посту, котра нам давать можливость освободжіня од того, што нас сперать. То є освободжіня од рабства жалудка, нестриманости, тіранії конзумізма, привязаности ку матеріалным предметам. Душа ся так ставать вольнішов, абы підняти свій погляд ку тым правдивым цінностям, ку вічности. Майме тото на памяти в тім святім часі. І выхоснуйме тот святый час на спасіня нашой бессмертной душі.

В неділю, 27. марця 2016 р., о 9.00 год. проґрам «Слово», котрий реалізує єромонах Маркіян ЧСВВ. Повторіня 27. марця о 12.00, 15.00, 20.00 год. і 28. марця о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото – Berthold Werner – джерело вікіпедия.