Сумар дня на 30. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 30. жолтня/октобра 2024 р.

Засіданя Спільной Коміциі Уряду та Нацийональных і Етнічных Меншын

24. жолтня/октобра прошло засіданя Спільной Коміциі Уряду та Нацийональных і Етнічных Меншын з участю міністра Томаша Сємоняка. Спілголовами Комісиі были: зо страны уряду – державный секретар Міністерства Внутрішніх Справ і Адміністрациі Томаш Шыманьскій, а з меншыновой страны: Григорий Куприянович. Міністер Сємоняк підкрислил, што квестиі тыкаючы нацийональных і етнічных меншын сут в політиці державы надзвычайні важны і єст то єдна з важнійшых обшыри Міністерства Внутрішніх Справ і Адміністрациі. В часі засіданя присутны бесідували о будучій політиці державы взглядом меншын і квестиі фінансуваня освіты меншын. Представлено плянувану высокіст середків перезначеных з буджету державы на 2025 рік на реализацию задач звязаных з охороном і розвитком культурной достоменности нацийональных і етнічных меншын та реґіонального языка. Окрем того на засіданю покликаня з рук віцеміністра Томаша Шыманьского до складу Комісиі одобрал представник ормяньской меншыны Грачя Бояджян.

Плястичный конкурс «Абстракциі і інчы атракциі в Новосільского»

Стоваришыня Локална Ґрупа Діяня «Dorzecze Wisłoka» та Фундация Салон Штукы просят до участи в плястичным конкурсі «Абстракциі і інчы атракциі в Новосільского». Малярскы працы мож пересылати до кінця жолтня/октобра. Конкурс направленый єст на учеників середніх шкіл, студентів і абсольвентів шкіл і університетів о плястичным профіли з обшыри підкарпатского воєвідства. Конкурсовы працы мусят кореспондувати з абстракцийном творчістю Новосільского. Інспірацийом можут быти хоснувана через артисту кольористика, форма ци композиция. Закваліфікуваны конкурсовом капітулом образы будут презентуваны на поконкурсовій выставі в Карпатскій Господі в Заршыні. Фінал конкурсу пройде 17. листопада/новембра, окрем выставы мож буде взяти участ в конференциі присвяченій творчости Юрия Новосільского та його корени. Цілю конкурсу єст не лем пошырюваня знаня на тему творчости Новосільского, але тіж промоция будуваного Центра Юрия Новосільского в Одреховій, одкале походил отец артисты.

Ґміна Команча разом з містом Меджелабірці в проєкті «Слідами І світовой войны на польско-словацкій граници»

Ґміна Команча разом зо своім словацкым сусідом, містом Меджелабірці отримала середкы на проєкт «Слідами І світовой войны на польско-словацкій граници», котрый буде реализуваный протягом найблизшого рока. Основом єст ведіня спільной промоциі подій в обшыри культуры, охороны і захованя культуровой спадковины. В рамках проєкту заплянувано м.ін. выпосажыня Ізбы Памяти в Команчы, котра найде ся в ново выремонтуваным будинку бывшой стациі PKP, ци реконструкцию цмонтеря з І світовой войны в Выдрані на Словациі. Додатково рішено орґанізувати прогульку і культурну подію на конец проєкту. В рамках задачы зорґанізуваный буде переізд до Меджелабірців на посвячыня одреставруваного цмонетря, а по святкуванях по словацкій страні готі будут перевезены до Команчы на одкрытя і посвячыня Ізбы Памяти. На сам конец пройде культурна подія в Щавным. Проєкт коштувал буде близко 100 тис. евро, з чого 80% коштів вкрыє дофінансуваня з Европейского Фонду Реґіонального Розвитку.

«Бескідскы Дзяды» вертают на сцену

Для тых, што іщы не мали нагоды видіти «Бескідскых Дзядів», маме добру новину.  Уж в найблизшый вікенд 2. і 3. листопада/новембра Театральна Ґрупа Племя з Устя Руского зас запрезентує свій спектакль. Як і в попередніх роках, пєсu мож буде обізріти в Высовій. «Бескідскы Дзяды» мают в собі не лем елементы «Дзядів» Адама Міцкєвича, але і навязаня до «Бескідскых Хронік» Анджея Стасюка, «Пілбасні» Тадеуша Новака та «Бомбля» лемківского писателя Мирослава Нагача. Рік в рік заінтересуваня пєсом єст так само великє, а Театральна Ґрупа з Устя Руского зберат самы позитивны опініі. Спектакль зачне ся о 18.00 год., вступ платный – 30 зл.