23-го марца припоминаме собі Світовый день Русинів

23-го марца од 2017-го року припоминаме собі офіціално Світовый день Русинів. Тото свято было схвалене Світовым конґресом Русинів (СКР), котрый проходив у 2017-ім році в хорватьскім Осієку.

День, котрый выбрав ся, має припоминати час, коли проходив 1-ый Світовый конґрес Русинів, якый одбыв ся 23-го і 24-го марца 1991-го року в Меджілабірцях.

Головным орґанізатором 1-го СКР была Русиньска оброда. Участныма на тій події по довгых роках офіціалного неіснованя были представителі Русинів з втогдышньой Чехословакії, Польщі, Совітьской Україны, Северной Америкы і втогдышньой Югославії.

Конґрес наштартовав новодобый возродный процес Русинів у вшыткых областях културно-общественного і хрістіаньского жывота в окремых державах.

Хоць Світовый день Русинів быв выголошеный у 2017-ім році Світовым конґресом Русинів, зробили ся офіціалны святкованя з боку конґресу лем раз. Світова рада Русинів вєдно з Русиньсков обродов на Словеньску  23-го марца 2019-го року зорґанізовали в Меджілабірцях святочну академію.

Окрім Світового дня Русинів окремы членьскы державы Світового конґресу Русинів святкують і свої народны дні, котрых даты суть повязаны з данов теріторійов або особностьов.