25-ый річник Карпатьской писанкы

Вже 25-ый річник выставкы під назвов Карпатьска писанка 2017 приготовив Вігорлатьскый музей в Гуменнім в співпраці із Окреснов орґанізаційов Унії жен Словакії в Гуменнім. Выставка заміряна на великодны писанкы ся того року одкрыє 16-го марца о 15.00 год. во выставных просторах гуменьского музею і буде єй мож видіти аж до 21-го апріля 2017-го року.

Як інформовала нашу редакцію Яна Федічова з Вігорлатьского музею в Гуменнім, на тім річнику выставкы бере участь веце як шістьдесять авторів писанок зо Словакії і веце як дві десяткы авторів із Україны, Польщі, Мадярьска і Чеськой републікы. Майже тісячь выставльованых писанок буде презентовати колекції традічных, но і новшых технік крашіня яєчок, котры ся всокотили і надалше розвивають ся в окремых областях Карпатьской котлины.

Тот рік і творчі ділні

В рамках юбілейного річника Карпатьской писанкы орґанізаторы приготовили на 17-го марца в просторах музею і творчі ділні крашіня писанок і унікатной технікы рештаврованя писанок за участи домашніх лекторів і робітників партнерьского Музею писанок із україньского міста Коломия. Од 20-го марца до 20-го апріля в рамках выставкы буде Вігорлатьскый музей вказовати окремы технікы крашіня писанок і школярям основных і середніх школ з реґіону.

Покровительство перевзяв Худік

Як далше інформовала Яана Федічова, покровительство над юбілейным 25-ым річником події Карпатьска писанка 2017 во Вігорлатьскім музею перевзяв председа Пряшівского самосправного краю Петер Худік. Як раз самосправный край, на котрого челі стоїть Худік, є зряджовательом музею. Подія є того року підпорена і з Фонду на підпору уменя, котрый належыть під Міністерство културы Словацькой републікы.

„Вігорлатьскый музей в Гуменнім дякує вшыткым авторам і навщівникам за актівну участь і інтерес при підпорі події, котра ся презентаційов традічного уменя крашіня писанок стала новым сімболом черезгранічных контактів, повязань і приятельства народів і народностей жыючіх в Карпатьскій котлині,“ закінчіла Федічова.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА