Сумар дня на 4. лютого/фебруара 2026 р.

Приносиме вам сумар медияльной ґрупы ЛЕМ.фм+ на ден 4. лютого/фебруара 2026 р.

Вернісаж выставы фотоґрафій з колекциі Діґітального Соспільного Архіву Ґміны Устя Рускє

Од парох місяців Фундация Мемо реализує проєкт, котрого цілю є зробити Діґітальный Соспільный Архів Ґміны Устя Рускє. В рамках той задачы етноложка і соспільна архівістка Реґіна Паздур стрічат ся з мешканцями і мешканками ґміны ци з особами повязаныма з ґміном, котры хотят ся поділити фотоґрафіями, споминами і істориями, што звязаны сут з реґіоном ґміны Устя Рускє. Вшыткы зобраны материялы сут пак діґітализуваны, архівізуваны і забезпечаны, пак публикуваны на сатйі casgug.pl (адрес сайту то першы буквы польскоязычного названя проєкту – Cyfrowe Archiwum Społeczne Gminy Uście Gorlickie). В пятницю 20. лютого/фебруара в будинку Туристичной Інформациі «Стара Реміза» в Высовій одбуде ся вернісаж выставы фотоґрафій з колекциі Діґітального Соспільного Архіву Ґміны Устя Рускє – вказаны будут 22 знимкы выбраны спосеред соток фотоґрафій згомадженых в рамках творіня архіву. На стрічы реализаторы проєкту: Реґіна Паздур і Мацєй Кудлацік будут шырше оповідати о зобраній колекциі і цілым архіві.

Мобільны плуца будут стояти в Санковій

В Ґміні Санкова зачала ся едукацийна кампанія «Посмотр чым оддыхаш». Цілю кампаніі єст звернути увагу мешканців на якіст повітря і усвідомити, же штоденны рішыня і привычкы мают реальне влияня на поправу якости повітря. Мобільны ключы вкажут, чым реальні оддыхаме – то інсталяция в виді великых клучів, котру поставлены были медже предшкольом а урядом ґміны в Санковій. Мобільны ключы будут гын стояти до кінця тырваня кампаніі, значыт до 26. лютого/фебруара. Конструкция оддыхат через біле полотно повітрьом з оточыня, а занечыщыня одкладают ся на сесым фільтрацийным полотні. З часом полотно темніє і образово вказує, чым оддыхаме наштоден. При ключах находит ся тіж ґратя до міряня складу повітря. Ступін занечыщыня ключів мож обсервувати тіж нажыво на каналі YouTube Польского Смоґового Алярму – парнтера акциі «Посмотр чым оддыхаш».

Образы русиньского маляря до обзераня в Ужгороді

В Закарпатскым Областным Музею Штукы ім. Йосифа Бокшая в Ужгороді одкрыли в минулу пятницю выставу вызначного русиньского артисты – маляря Володиміра Микыты. 1. лютого/фебруара артиста скінчыл бы 95 років (вмер в липци/юлия минулого рока). На експозициі презентуваны сут образы з ріжных етапів творчости маляря, котры позваляют познати окремы етапы його артистичной спадковины – в тым тоты знаны і дакус менше популярны творы. Образы походят з приватных колекций та зо збіркы самого Музею. Вчас вернісажу присутны были голова Закарпатской Областной Рады Андрий Шекета, начальник Одділіня Культуры Закарпатской Областной Державной (Воєньской) Адміністрациі Євген Тищук, директор музею Франциск Ерфан ци ректор Закарпатской Академіі Штук Михайло Приймич. Пристуна была тіж родина Володиміра Микыты. Артиста жыл в роках 1931-2025, был абсольвентом ужгородской школы, продолжувательом традиций Підкарпатской Малярской Школы Йосифа Бокшая і Адальверта Ерделія. Был успішнім портретистом, автором жанровых сцен, пейзажів. Был активный в соспільным і культурным жытю Русинів.

«Никыфор. Феномен саморідного таланту»

Од найблизшой пятниці в Музею Міди в Ліґници презентувана буде выстава пн. «Никыфор. Феномен саморідного таланту». До обзераня буде 50 камеральных рисунків Епіфана Дровняка, датуваных на меджевоєнный період. Презентуваны роботы походят з колекциі Роберта Довгана, а експозицию дополняют архівальны фотоґрафіі з колекциі Павла Карлика і Анны Броды-Карлик. На вернісажы выступит співоча ґрупа Лемківского Ансамблю Пісні і Танця Кычера. Початок вернісажу о 17.00 год. Выставу буде мож обзерати до 30. мая тр.