440 тісяч людей навщівило в минулім році музеї і ґалерії ПСК

За културов до музеїв і ґалерій Пряшівского самосправного краю (ПСК) пришло у 2024-ім році 440 тісяч людей, з того 400 тісяч завітало лем до музеїв. Інформовало о тім Одділіня комунікації ПСК.

Найвеце навщівників, аж 205 тісяч, евідовали знова в Любовняньскім музею – на граді в Старій Любовні. Припоминаме, же і в минувшім році быв запертый Музей модерного уменя Енді Варгола в Меджілабірцях, в котрого будові проходить велика реконштрукція.

Людей тягло і до Гуменного ці Бардейова

Як інформовало Одділіня комунікації ПСК, до Старой Любовні людей притягла і выняткова выстава комплетного портфолія Кральовной Нытомбі, котра выникла як співпраца меджі Любовняньскым музейом і Музейом модерного уменя Енді Варгола.

Творы Енді Варгола в минувшім році мож было видіти і за граніцями Словакії, наприклад на выставі в Німецьку ці Польщі, де собі їх посмотрило понад 9 тісяч людей.

Звекшуючім ся чіслом навщівників може похвалити ся Шарішскый музей в Бардейові. У 2024-ім році навщівило його ескпозіції в Бардейові і Бардейовскых Купелях, де є сканзен народной архітектуры, понад 43 тісяч людей. І до Вігорлатьского музея в Гуменнім пришло веце людей. Його експозіції в ренесанчнім каштелю і сканзені виділо понад 33 тісяч людей.

Богатый проґрам на 2025-ый рік

У 2025-ім році продовжує ся в рекошнтрукції Музея модерного уменя Енді Варгола в Меджілабірцях. Як інформовав край, у новых просторах бы мав музей привітати першых навщівників восени того року.

Довтогды буде мож творы Варгола видіти на выставах у Франції, Чеській републіці і в Польщі.

В рамках културных інштітуцій, котры належать під Пряшівскый самосправный край і суть в русиньскых реґіонах, Вігорлатьскый музей в Гуменнім тот рік приготовлює приповідковы експозіції, вечерны концерты на дворі каштеля ці театер в сканзені.

Шарішскый музей в Бардейові, конкретно сказен в Бардейовскых купелях, тот рік припомяне собі 60 років од свого отворіня. Єдным із подарунків про навщівників буде і проходяча реконштрукція його обєктів.

Любовняньскый музей в Старій Любовні рихтує нову експозіцію, котра буде присвячена скарбам прінцезен де Бурбон. Сприступнена бы мала быти в місяці юл як припомянутя 40-ой річніці смерти іспаньской прінцезны Ісабелы де Бурбон Замойской, послідньой маїтелькы граду Любовня.

Так само 40 років свого існованя одсвяткує сканзен під градом Любовня, і то в місяці май того року.