58-ый Драматічный меморіал одбуде ся в апрілю

Як інформовала аґентура Рутенпрес, 58-ый Драматічный меморіал „Петра Ризнича Дядї“ одбуде ся в днях 17-го аж 26-го апріля 2026-го року в Руськім Керестурі. Вырішыв о тім Орґанізачный комітет на своїй стрічі 6-го фебруара.

Тогорічный меморіал принесе публіці чотыри театралны представліня про дорослых, і чотыри представліня про діти.

Як інформовали орґанізаторы, Русиньскый народный театер „Петро Ризнич Дядя“ представить ся із пєсов Кантата про Ленку і Лазу, котрой автором і режісером є Славко Орос. Драматічне штудіо „Звонимир Павлович“ при Русиньскім културнім центрі в Новім Саді представить ся із пєсов Чорный лебідь, яка є роблена на мотівы тексту драматурґа, по котрiм імя несе штудіo, в адаптації і режії Славка Виная.

Акторы Театру „Стеван Сремац“ при Домі културы в Червінці, меджі котрымa суть і аматеры з Руського Керестура, на меморіал прийдуть із представліньом під назвов Ілузії. Меморіал привітать акторів із Културного центра Кула, котры заграють пєсу Джона Патріка Шенлі з назвов Підозріня, в режії Слободана Станковіча.

Театры з Кулы і Червінкы на 58-ім Драматічнім меморіалі будуть мати і представліня про діти на сербскім языку. Наймолодша публіка буде годна видіти і нову пєсу про діти на русиньскім языку Драматічного штудія „АРТ“ при Домі културы в Руськім Керестурі на мотівы Карла Колодія Авантура єдного робота, в режії Ребекы Планчак і Мірослава Малацка, котры пририхтовали текст вєдно із дітячім ансамбльом.

В рамках фестівалу буде мож видіти і ляльковый театер про діти, інсценацію з назвов Тішыть ня, я Русин/Русинка Драматічного штудія „Звонимир Павлович“ Русиньского културного центра, котру пририхтовали Ана-Марія Рац і Оля Яковлєв.

В рамках фестівалу суть планованы і супроводны події. Меморіал почне одкрытьом выставы масок і ляльок із новосадьского Театру молодых, в плані є так само, жебы почас фестівалу одбыла ся і презентація зборника Дюры Латяка під назвов Руски народни театер „Петро Ризнич Дядя“ – 50 роки.