«70%» – Лемковина з Рудна, ч. 12 – неділя, 18.00 год.

Cherchez la femme ци то Шерше ля фам – повідают Французы, значыт – Глядайте жену! Коли справа якыса незрозуміла, не годны сте єй для себе выяснити – глядайте гын жену! Глядайте жену – і найдете причыну ци мотив. А і доправды, даколи трудно одраз видіти, же часто власні жена вшыткым рядит, ци жена єст причыном ріжных, нераз і незрозумілых подій.

Жены одограли велику ролю і в ансамбли Лемковина з Рудна. Але повіме лем о єдній – о Ользі Дракус, по мужу Кушнір. То власні она перше грала на бандурі в Черемошы – фольклорно-етноґрафічным ансамбли Львівского Університету. Зато, коли Іван Кушнір зачал рядити хором Лемковина, она припомнула мужови о оркєстрі Черемоша – ци бы ся не придала і Лемкам така оркєстра? Припомнула Ольґа і о тым, хто рядил том оркєстром перше – а то был Зиновій Булик, а тепер, так выглядат, він уж і забыл, як грати на гушлях… То власні она, Ольґа Кушнір, коли за Буликом гудакы з Черемоша такой пришли в Лемковину, вошла зо свойом бандуром – хоц Лемкы бандур до граня колиси і не мали, лем бандуркы до іджыня.

Но і то была добра ідея – створити ґрупу гудаків при Лемковині. Тринадцет років грал для Лемків, а тіж рядил оркєстром Зиновій Булик і барз приємні йому днеска тото споминати. Тринадцет років жытя з Лемками, в світі лемківскых мелодий… Лем же не вшытко, што товды грали, награли. Зато фраґменты інструментальных творів, якы выконувала оркєстрова ґрупа, днеска звучат в выконаню Нацийональной Академічной Оркєстры Народных Інструментів Украіны. А лемківскы співанкы, розуміє ся, выконуют співакы і гудакы з Лемковины. А медже нима і наш днешній гіст Зиновій Булик…