70. років парохіі в Зимній Воді

В понедільок, 28. серпня/авґуста т.р., в ден Успіня Пресвятой Богородиці, православна парохія в Зимній Воді святкувала округлу, 70. річницю ериґуваня – поінформувал про тоту подію сайт православной вроцлавско-щеціньской єпархіі. На храмовий праздник, а при тым округлий ювілей, прибыл архієпископ Юрий, владыка вроцлавско-щеціньской єпархіі при участи дальшых священників. В торжестві окрем чысленно згромадженых вірных взяли участ і запрошены гості та самоурядовы власти.

В проповіди владыка Юрий зазначыл, што 2017 рік є барз важний для Церкви та вшыткых парохіян за причыном траґічной выселенчой операциі. Прибывам до Вас як Ваш новий владыка по смерти владыкы Єреміі, маючы заєдно надію на добру спілпрацу – проповідал архієпископ Юрий. По Божескій Літургіі вчас хрестного ходу была святочно одкрыта і посвячена пропамятна таблиця, а перед входом до храму зіля принесене вірныма на праздник. То моє перше свято во вроцлавско-щеціньскій єпархіі. Перше в лемківскій парохіі, де стрічам ся з віром та богатством культуры і яызка. Похылам ся днес перед тыма, котры на Землях Одзысканых сотворили гевсу єпархію (…) – продолжал владыка. На закінчыня торжества владыка нагородил почестныма грамотами заслуженых прихожан.

Істория парохіі в Зимній Воді є безпосередньо повязана з акцийом Вісла. Была она офіцийні ериґувана в серпни/авґусті 1947 рока о. митр. Йоаном Левярьом. Парохію з зачатку творило двадцет єден русиньскых родин з Бортного на Лемковині та двадцет родин Украінців з Холмщыны. Інтересуюче, што традициі церковного співу принесены на чужыну выселeнцями з Бортного перетырвали в тій парохіі до днес. Вчас Богослужынь настоятель парохіі о. Юрий Малиш дякувал прибывшому на праздник парохови бортняньской церкви свв. Космы і Даміана, о. Мирославови Цідилі, якій до Зимной Воды приіхал з двадцетособовом ґрупом днешніх жытелів Бортного. Ныні парохію в Зимній Воді творят тоты Лемкы і іх потомны, якы не змогли по 1956 році вернути до Бортного. До парохіі в Зимній Воді приналежат вірны з сусіднього Лісця. Дочырньом церквю є храм св. Михала Архангела в Михалові, де прихожанами сут в більшости потомны выгнаных Фльоринчан.

При кінци торжественных богослужынь вірны кланяли ся копіі іконы Почаівской Богородиці, яка была в 30. роках ХХ ст. привезена з Почаівской Лавры до Бортного, а пак забрана вірныма вчас выгнаня до Зимной Воды.

Більше фотоґрафій – за мотузком.