ТАД номінованый на Премію Академії театралных творців

„Найліпша пєса (гра) 21-го столітя про двох акторів (грачів)“, писало ся в анотації Театру Александра Духновіча, кедь приготовльовали інсценацію під назвов Пісковиско од польского драматурґа Михала Валчака.

Теперь ся Пісковиско, котре режійно приготовив Браньо Мазух з акторками Зденков Квасковов і Іветов Фейковов, дістало меджі 14 номінацій, з котрых выберуть, хто тот рік премєрово здобуде нову Премію Академії театрланых творців (Akadémia divadelných tvorcov).

Премія Академії

Академія театралных творців была основана у 2018-ім році з ініціатівы фаховців в практічній і теоретічній области театру. Тота ініціатіва хоче споїти особности словацькой театралной културы з области творчости, театралной наукы, крітікы і історії.

Премія Академії театралных творців за театралну інсценацію є проєктом, котрый тот рік орґанізує ся першый раз і цільом є рефлектовати творчость вшыткых театрів на Словакії, котры о то в даній сезоні проявлять інтерес. Не є анкетов, в котрій ся голосує, фунґує на основі добровольного приголошіня. Вшыткы театры і театралны зґрупованя годны приголосити єдну, припадно веце пєс, подля того, кілько премєр в сезоні планують.

В першім колі мусять вшыткы членове комісій, котры суть зряджены про тоту премію, посмотрити вшыткы приголошены інсценації в реґіоналных округах, котрыма суть Братіслава І. і ІІ., Запад, Середина і Выход, і выбрати 2 аж три інсценації, котры номінують на Премію Академії. В другім колі верьховна комісія по посмотріню вышткых номінованых пєс выголосить єдну, котра стане лавреатом.

В першім річнику было приголошеных 27 театрів із 40-ма пєсами. В окрузі Выход ся до номінацій дістав Драматічный колектів Штатного театру Кошыці з пєсов Адамовы ябка, мадярьскый Театер Талія з Кошыць з пєсов Терор, і русиньскый Театер Алексаднра Духновіча з Писковіском.

Позітівна крітіка

Писковіско русиньского театру має на сайті Академії театралных творців позітівне оцініня. О пєсі пишуть як о вырівнаній, штілово „чістій“ інсценації, котра дає публіці імпулзы на роздумованя о важности людьской комунікації.

За проблематічный момент крітіци беруть надвязаня прямого контакту з публіков, котрый є „штіловым переломом“. Акторкы в середині інсценації роблять анкету меджі публіков, котра подля членів журі не є потрібна.

Наперек тому пєсу Пісковиско беруть за інсценацію, котра „має елементы модерности, акторьской чістоты і продуманой режійной концепції. Є свіже, нерушыве і естетічне. Має єднозначны атрібуты театралности. То путь, як дістати молоду публіку до театру,“ продовжує ся на сайті Академії о пєсі.

Валчаково Пісковиско є позітівно оціньованє і вдяка факту, же є в „контексті діялности споминаного драматічного колектіву (Театру Александра Духновіча, поз. ред.) унікатным інтерпретачным ділом, бо колектів під веджіньом режісера Браня Мазуха, в єдній особі і высокошкольского педаґоґа Театралной факулты Академії музичных умень в Празі, презентує особистый тіп інтерпретації драматічного тексту.“

Лавреат першой Премії Академії театралных творців буде выголошный 13-го децембра 2019-го року почас святочного ґалавечора в Синім салоні Словацького народного театру.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА