Франц Шуберт, «З повагом», просит Павел Малецкій – неділя, 20.00 год.

Франц Шуберт был австрийскым композитором і єдным з прекурсорів романтичного стилю в музиці. Створил близко 1000 творів, преферувал пісні.

Вродил ся Ф. П. Шуберт в 1797 р. в Австриі. Першыма учытелями были му отец і старшый брат. Вчыл ся грати на гушлях, фортепіані і орґанах. Співал тіж в царскым хлопячым хорі, пак остал гушлярьом в дворскій капели.

Жебы не піти до войска, студиювал в учытельскій семінариі, котру лишыл в 1816 р. i стал артистом. Молодый Шуберт мал уж товды на конті 5 опер, 5 симфоній, 4 мессы і пару камеральных творів, в тым пісні. Коли замешкал во Відни – бідувал.

До 1822 р. скомпонувал іщы 3 оперы, пару фортепіановых сонат і месс, а тіж дальшы пісні та камеральны творы. Не мал щестя і смілости до жен. Заразил ся венеричном хворотом, котра в наступных роках была причыном болю і депресиі. Мимо противности дале компонувал. Вмер в 1829 році во Відни, маючы лем 31 років.

В проґрамі почуєте м.ін. фраґмент симфоніі до мажор, смыкового квартету ре мінор та фортепіановый квінтет ля мажор і смыковый квартет ля мінор.