Похорон бл. п. Апостольского Адміністратора

Перед парома днями подали сме в нашій части «З архівной пресы» польскоязычну реляцию з похорону першого адміністратора Апостольской Адміністрациі Лемковины, др. Василия Масцюха. Была то статя з ґазеты Głos Podhala. Владыка пришол на світ 30. марця 1873 р., прото днес як раз споминаме дальшу річницю його народжыня.

I такой днескы рекомендуєме чытати лемківскоязычну статю з ґазеты Лемко, ч. 12 (96), котра надрукувана была такой по похороні, 26. (13.) марця 1936 р. Єст то, подібні як приведеный перед парома днями текст, дост детальна реляция з похорону о. Василия Масцюха. Як сме уж писали, Лемкы привыкли называти о. Масцюха владыком, хоц не мал він єпископской хіротоніі. В тій статі так само споминат ся на першого лемківского владыку.

Вартат порівнати обі реляциі. Польскоязычну з ґазеты Głos Podhala найдете за тым мотузком.

Похорон бл. п. Апостольского Администратора

Похорон бл. п. Апостольского Администратора О. Д-ра Василия Масцюха отбыл ся величаво. Дня 15. марта от рана приізджали до Рыманова численны автомобилі, с котрых высідали высокы достойникы Церкви и Державы. В торжестві експортации тіла приняли участь епископы лат. и гр. обряда и делегаты всіх министерств и войска. Пращальну бесіду при выносі тіла с палаты высказал О. Ядловскый, почетный крылошанин и совітник консыстории Ап. Адм., котрый в короткых и теплых словах высказал жаль по утраті першого лемковского Владыкы, котрому передвчасна смерть не позволила перевести начатого великого діла соєдинити религийно розлучене чадо. От имени Сгавропигийского Инстытута попращал покойного Сениор Др. Антоний Гулла, котрого бесіду подаєме точно на другом місци. Похоронный кондукт направил ся до церкви в Дошні, где отслужено панихиду, по котрой перевезено тіло пок. Ап. Администратора до єго родинного села Новой-Веси в пов. ного-сандецком.

В понеділок рано о год. 9-ой начали ся в Новой-Веси похоронны торжества, котры тревали до год. 3-ой по полудни. В похоронах приняли участь численне священство обох обрядов, делегаты державных и войсковых властей, делегаты рускых центральных и міецевых обществ, учительство с доокрестных школ, много школьных дітей и численны толпы народа. Латинскый епископ с Тарнова, Ексцеленция Д-р Лисовскый в товаристві делегата Его Еминенции Примаса, пралата Бржозовского и численно собраного лат. клира отслужил „екзеквии”, по котрых наше священство начало правити похоронны молитвы. О год. 11-ой приіхал перемыскый епископ Ексцеленция Коцыловскый, котрый отслужил соборну архиєрейску Службу Вожу. В церкви попращал пок. Ап. Администратора О. Фенич, парох с Войковы, а надгробне слово высказал О. Евгений Хиляк из Крыницы. В короткых, теплых словах попращал он своєго Владыку и товариша с лавкы школьной и поблагодарил всіх, принявших участь в похоранном торжестві.

От имени Лемко-Союза попращал пок. Владыку предсідатель того Т-ва Д-р Орест Гнатышак. Тылицкый оркестр отограл „Вічную память” и „Со святыми” и смутне торжество окончило ся. Опечаленый горем народ подходил ку открытой могылі и послідным взглядом и щиром молитвом пращал своєго першого Лемковского Владыку.