«Слово» – Неділя самаріянкы – неділя, 9.00 год.

Неділя самріянкы нам говорить події, коли Іусус стрічать при Якововій студні самаріяньску жену, котра приходила черьпати воду. Ісус просить од ньой воды.

Она реаґує зачудовано: Як же ты, Жыд, просиш воды од мене самаріяньской жены? Тадь нашы народы ся не сходять. Ісус знать, чом то робить. Хоче привести тоту жену ку духовному розуміню.

Бісідує о воді, котру дасть Він сам, а же никого із той воды уж не буде тлоїти, хто ся напє. Но жена не розуміє, о якій воді Він говорить. Она думать тілесно. Прото Ісус їй пояснює і веде тоту жену, жебы прягла по тій воді. А коли хоче ся напити такой воды, Ісус їй одкрывать, же она є затліта не од недостатку воды, але од горячкы страстей. Мала єсь пять мужів, а тот, із котрым жыєш, не є твій муж.

Жена переходить на духовну бісіду аж приходить ку Месійови: Коли Він прийде, повість нам вшытко. А Ісус ся їй одкривать – то я. І она іде до міста а звістує людям, жебы пришли посмотрити на того, котрый мі повів вшытко, што я поробила, ці то не є Хрістос. Она ся напила той воды познаня і одпущіняа, сама ся стала тым жрідлом, як Ісус обіцяв. Бо она іде і звістує.

Ісус і нас позывать ку жывій воді – його слова, його одпущіня і милосердя. Жебы сьме ся напили і самы так стали ся тым жрідлом, із котрого будуть черьпати і другы. Так, як то было і зо самаріяньсков женов. Хрістос воскрес!

В неділю, 30. мая 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. мая о 12.00 год. і 31. мая о 2.00 год. за русиньскым часом.