Обзерач Природы #37 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 25. червця/юнія 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Хоц качкы на головній знимці, то так цілком о качках не буде в найблизшым одтинку «Обзерача Природы». Як памятате, од парох уж тыжнів бесідуєме в проґрамі о Сандеччыні, смотрячы на ню з ріжных стран. В пятницю буде не лем остатня уж така «сандецка» авдиция, але і остатня перед вакациями. Так, так, дорогы слухачы. Бедучый проґрам мусит одпочати, поіхати до ліса, подыхати свіжым повітрьом і поглядати новых тем до «Обзерача Природы», жебы дале Вас чарувати своім голосом в радию од вересня/септембра.

Тепер дост жартів і приватного тону. То што почуєте в остатню пятницю червця/юнія? Буде о звірятах, якы жыют на Сандеччыні. О борсуках, выдрах, лишках, як і о карпатскым тритоні ци змыі звычайній. То буде абсолютні найбарже зоолоґічный одтинок, якій появил ся в ЛЕМ.фм. Мусите з нами быти і слухати. Сердечні просит Вас автор проґраму, Якуб Зиґмунт.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.