Реляция з Сойму – тема лемківскых лісів – субота, 16.15 год.

Як сме уж інформували на нашым сайті, в віторок, 20. липця/юлия 2021 р., проходило в будинку Сойму Польской Республикы засіданя Комісиі Нацийональных і Етнічных Меншын, якє было посвячене справі зворотів нелеґально забраных державом лемківскых лісів.

Окрем представників міністерияльных власти, Державных Лісів і посланців, присутны были і репрезентанты лемківскых інтересів. В засіданю брал участ проф. Штефан Дудра, репрезентант лемківской меншыны в СКУтНіЕМ. Был так само ґорлицкій юриста, радця правный Павел Сокіл, котрый веде вельо справ выселеных Лемків і іх потомных, якы старают ся за зворот забраного нелеґально маєтку. Стоваришыня Лемків і Стоваришыня «Руска Бурса» в Ґорлицях представлял Севериян Косовскій. Од імене ЛАПіТ «Кычера» з Ліґниці присутный был Юрий і Данько Стариньскы. Обєднаня Лемків репрезентували Штефан Клапик і Григорий Суханич.

Цілю стрічы было выпрацувати розвязаня, жебы Лемкы могли в пошануваню іх громадяньскых прав домагати ся зверніня нелеґально забраных лісовых ділянок. Становиско польскых власти в тій справі єст некорыстне, хоц лемківскы стремліня голосно підпорил посол Громадяньской Коаліциі, Євгеній Чыквін.

Засіданя Комісиі вартат послухати в радию ЛЕМ.фм, жебы знати, хто єст прихыльный, а хто лем хоче перешкодити стараючым ся о зворот Лемкам. Посланкыня ґорлицкой землі, Барбара Бартусь (Право і Справедливіст) повіла:

«Не мож бесідувати о лемківскых лісах, бо в моменті коли тота обшыр была опущана, то не были лісы».

Мы знаме, што нашы діды вчас выгнаня мали на власніст удокументованы лісовы парцелі, на якых садили іщы іх вітцьове. Правды той не даст ся змінити єдным слоґаном.

Реляция буде одвысылана в радию ЛЕМ.фм в суботу, 24. липця/юлия. Зачынаме о 15.00 год.

джерело звуку: System Informacyjny Sejmu