Передватряна «Бесіда» – чытайме своє

В передден 41. Лемківской Ватры на Чужыні, головный орґанізатор той подіі, а і выдавця гевсого часопису – Стоваришыня Лемків выпустило дальшый номер свого пресового орґану – «Бесіда», ч. 4 (181) за місяці липец/серпен 2021 р.

Гевсе чысло, подібні як три попередні, іщы раз кличе вшыткых нас до гордого записуваня ся в Нацийональным Повселюдным Списі, якій тырват до кінця вересня/септембра 2021 р.

В посліднім выданю прочытаме м.ін. статі:

• Олена Дуць-Файфер, Што з лемківскым языком в освітовій і науковій сфері;
• Севериян Косовскій, Дуць-Файфер, Головчак і Маестро Трохановскій. З іх творами стрітили ся тогорічны матуристы; 
• Севериян Косовскій, Одбыл ся ІХ Конґрес Стоваришыня Лемків; 
• Петро Трохановскій, Моі Світовы Конґресы Русинів (3);
• Андрий Копча, Справопис з діяльности Головного Заряу Стоваришыня Лемків за час од 6. квітня 2019 рока до дня 2. липця 2021 рока;
• Пeтр. В. Алабин, Штырі войны. Похідны запискы в 1848, 1853, 1854-56, 1877-78 роках; (шырше до темы: Русины Австрийской Імпериі в дневниках і споминах росийскых офіцерів – участників Мадярского Походу 1849 рока).

Всередині находят ся біоґрамы членів нового Головного Заряду і Головной Ревізийной Комісиі Стоваришыня Лемків, кєд же 3. липця/юлия 2021 р. в Ліґници одбыл ся ІХ Конґрес орґанізациі.

Чытати можеме так само польскоязычный допис про мураль во Фльоринці і особу Михала Романяка, Фльоринчана, а пак долголітнього жытела села Михалів на выгнаню і старосту Лемківской Ватры, яка одбыват ся в тым селі.

Історична част припоминат нам о 100. річници сандецкого процесу. Был то процес, в якым суджено лідерів Руской Народной Республикы Лемків. О тым же розправлят Богдан Горбаль.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст в четвергы в год. 10.00-15.00, в суботы в год. 10.00-13.00 або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.